parchhaiyan

kyuuñ na ab tum se tasavvur meñ karūñ baat suno tum se ye kahnā hai mujhe

tum kahogī nahīñ maiñ vaj.h-e-suḳhan jaan ga.ī

yaad se terī hī ma.amūr haiñ din-rāt ye kahnā hai mujhe

tum kahogī ki maiñ hastī ko kafan maan ga.ī

rāh-e-ulfat meñ kabhī hogā tirā saath ye kahnā hai mujhe

tum kahogī maiñ zamāne kā chalan jaan ga.ī

kaun badlegā ye hālāt ye kahnā hai mujhe

tum kahogī maiñ unheñ dār-o-rasan maan ga.ī

zindagī ye hai to marnā bhī hai bārāt ye kahnā hai mujhe

tum kahogī ki ye maiñ soḳhta-tan jaan ga.ī

2

maiñ zamāne ke huuñ aa.iin kā pāband ye kahnā hai mujhe

tum kaho dekho ki ye marg-e-abad hai ki nahīñ

haañ maiñ is pe huuñ razā-mand ye kahnā hai mujhe

tum kaho jaur-e-zamāñ kī koī had hai ki nahīñ

mujh pe har raah huī band ye kahnā hai mujhe

tum kaho zinda giraftār-e-lahad hai ki nahīñ

haañ giraftār huuñ do chand ye kahnā hai mujhe

tum kaho ne.amat-e-hastī se ye kad hai ki nahīñ

3

tum merī ziist ke vīrāne meñ partav ho ḳhayābānoñ kā

maiñ to sarsar huuñ ki vīrānoñ se kyā mel ḳhayābanoñ ke

tum to ho naġhma-e-shab-tāb mare ujḌe shabistānoñ kā

maiñ to shevan huuñ ki shevan haiñ nishāñ aise shabistānoñ ke

tum nayā ruup rachāo nayā siñgār ho mere na.e armānoñ kā

maiñ to huuñ ḳhūn-e-tamannā ki sadā ḳhuun huā karte haiñ armānoñ ke

tum to amrit ho malāloñ ke alaav meñ jalī jānoñ kā

maiñ nahīñ raakh bhī kyā aur nishāñ hoñge malāloñ se jalī jānoñ ke

kyun na ab tum se tasawwur mein karun baat suno tum se ye kahna hai mujhe

tum kahogi nahin main wajh-e-suKHan jaan gai

yaad se teri hi mamur hain din-raat ye kahna hai mujhe

tum kahogi ki main hasti ko kafan man gai

rah-e-ulfat mein kabhi hoga tera sath ye kahna hai mujhe

tum kahogi main zamane ka chalan jaan gai

kaun badlega ye haalat ye kahna hai mujhe

tum kahogi main unhen dar-o-rasan man gai

zindagi ye hai to marna bhi hai baraat ye kahna hai mujhe

tum kahogi ki ye main soKHta-tan jaan gai

2

main zamane ke hun aain ka paband ye kahna hai mujhe

tum kaho dekho ki ye marg-e-abad hai ki nahin

han main is pe hun raza-mand ye kahna hai mujhe

tum kaho jaur-e-zaman ki koi had hai ki nahin

mujh pe har rah hui band ye kahna hai mujhe

tum kaho zinda giraftar-e-lahad hai ki nahin

han giraftar hun do chand ye kahna hai mujhe

tum kaho neamat-e-hasti se ye kad hai ki nahin

3

tum meri zist ke virane mein partaw ho KHayabanon ka

main to sarsar hun ki viranon se kya mel KHayabanon ke

tum to ho naghma-e-shab-tab mare ujDe shabistanon ka

main to shewan hun ki shewan hain nishan aise shabistanon ke

tum naya rup rachao naya singar ho mere nae armanon ka

main to hun KHun-e-tamanna ki sada KHun hua karte hain armanon ke

tum to amrit ho malalon ke alaw mein jali jaanon ka

main nahin rakh bhi kya aur nishan honge malalon se jali jaanon ke