pyar ke tohfe

na jaane kyā milā kyā hasrateñ baaqī rahīñ dil meñ

abhī duniyā se kyā kuchh aur lenā hai

mujhe to ye ḳhabar hai

ye dahaktī aag

sab kuchh ḳhaak kar degī

faqat merā nishāñ

uThtā dhuāñ

chāroñ-taraf rishtoñ pe mailī raakh chhiḌkātā

ye tezābī

rag-o-pai meñ panaptā zahar

maġhrūrāna be-zārī

nigah-dārī kī dīvāreñ khaḌī kartī

ye sab us aag meñ kyuuñ jal nahīñ jaate

abhī duniyā se kyā kuchh māñgnā hai

kyā jhapaTnā hai

maiñ saa.il huuñ luTerā huuñ

huī hai masḳh yuuñ sūrat kī pahchānī nahīñ jaatī

maiñ kab tak jhoñktā jā.ūñgā ye tanūr

lahkī aag se kab nuur phūTegā

koī nannhī kiran dhīmī sī lau

mujh se kaheñ to chāñdnī phaile

maiñ kab duniyā ko lauTā.uñgā us ke pyaar ke tohfe

na jaane kya mila kya hasraten baqi rahin dil mein

abhi duniya se kya kuchh aur lena hai

mujhe to ye KHabar hai

ye dahakti aag

sab kuchh KHak kar degi

faqat mera nishan

uThta dhuan

chaaron-taraf rishton pe maili rakh chhiDkata

ye tezabi

rag-o-pai mein panapta zahar

maghrurana be-zari

nigah-dari ki diwaren khaDi karti

ye sab us aag mein kyun jal nahin jate

abhi duniya se kya kuchh mangna hai

kya jhapaTna hai

main sail hun luTera hun

hui hai masKH yun surat ki pahchani nahin jati

main kab tak jhonkta jaunga ye tanur

lahki aag se kab nur phuTega

koi nannhi kiran dhimi si lau

mujh se kahen to chandni phaile

main kab duniya ko lauTaunga us ke pyar ke tohfe