raat aur rail

phir chalī hai rail station se lahrātī huī

nīm-shab kī ḳhāmushī meñ zer-e-lab gaatī huī

Dagmagātī jhūmtī siiTī bajātī kheltī

vaadī o kohsār kī ThanDī havā khātī huī

tez jhoñkoñ meñ vo chham chham kā surūd-e-dil-nashīñ

āñdhiyoñ meñ meñh barasne kī sadā aatī huī

jaise maujoñ kā tarannum jaise jal-pariyoñ ke giit

ek ik lai meñ hazāroñ zamzame gaatī huī

naunihāloñ ko sunātī mīThī mīThī loriyāñ

nāznīnoñ ko sunahre ḳhvāb dikhlātī huī

Thokareñ khā kar lachaktī gungunātī jhūmtī

sarḳhushī meñ ghuñgruoñ kī taal par gaatī huī

naaz se har moḌ par khātī huī sau pech-o-ḳham

ik dulhan apnī adā se aap sharmātī huī

raat kī tārīkiyoñ meñ jhilmilātī kāñptī

pTriyoñ par duur tak sīmāb jhalkātī huī

jaise aadhī raat ko niklī ho ik shāhī barāt

shādyānoñ kī sadā se vajd meñ aatī huī

muntashir kar ke fazā meñ jā-ba-jā chiñgāriyāñ

dāman-e-mauj-e-havā meñ phuul barsātī huī

tez-tar hotī huī manzil-ba-manzil dam-ba-dam

rafta rafta apnā aslī ruup dikhlātī huī

sīna-e-kohsār par chaḌhtī huī be-iḳhtiyār

ek nāgan jis tarah mastī meñ lahrātī huī

ik sitāra TuuT kar jaise ravāñ ho arsh se

rif.at-e-kohsār se maidān meñ aatī huī

ik bagūle kī tarah baḌhtī huī maidān meñ

jañgaloñ meñ āñdhiyoñ kā zor dikhlātī huī

rāsa-bar-andām kartī anjum-e-shab-tāb ko

āshiyāñ meñ tā.ir-e-vahshī ko chauñkātī huī

yaad aa jaa.e purāne devtāoñ kā jalāl

un qayāmat-ḳheziyoñ ke saath bal khātī huī

ek raḳhsh-e-be-ināñ kī barq-raftārī ke saath

ḳhandaqoñ ko phāñdtī Tīloñ se katrātī huī

murġh-zāroñ meñ dikhātī jū-e-shīrīñ kā ḳhirām

vādiyoñ meñ abr ke mānind mañDlātī huī

ik pahāḌī par dikhātī ābshāroñ kī jhalak

ik bayābāñ meñ charāġh-e-tūr dikhlātī huī

justujū meñ manzil-e-maqsūd kī dīvāna-vār

apnā sar dhuntī fazā meñ baal bikhrātī huī

chheḌtī ik vajd ke aalam meñ sāz-e-sarmadī

ġhaiz ke aalam meñ muñh se aag barsātī huī

reñgtī muḌtī machaltī tilmilātī hāñptī

apne dil kī ātish pinhāñ ko bhaḌkātī huī

ḳhud-ba-ḳhud rūThī huī biphrī huī bikhrī huī

shor-e-paiham se dil-e-gītī ko dhaḌkātī huī

pul pe dariyā ke damā-dam kauñdtī lalkārtī

apnī is tūfan-añgezī pe itrātī huī

pesh kartī biich naddī meñ charāġhāñ kā samāñ

sāhiloñ par ret ke zarroñ ko chamkātī huī

muñh meñ ghustī hai surañgoñ ke yakāyak dauḌ kar

dandanātī chīḳhtī chiñghāḌtī gaatī huī

aage aage justujū-āmez nazreñ Dāltī

shab ke haibatnāk nazzāroñ se ghabrātī huī

ek mujrim kī tarah sahmī huī simTī huī

ek muflis kī tarah sardī meñ tharrātī huī

Tez-e-raftār ke sikke jamātī jā-ba-jā

dasht o dar meñ zindagī kī lahar dauḌātī huī

Daal kar guzre manāzir par andhere kā naqāb

ik nayā manzar nazar ke sāmne laatī huī

safha-e-dil se miTātī ahd-e-māzī ke nuqūsh

haal o mustaqbil ke dilkash ḳhvāb dikhlātī huī

Dāltī be-his chaTānoñ par haqārat kī nazar

koh par hañstī falak ko aañkh dikhlātī huī

dāman-e-tāriki-e-shab kī uḌātī dhajjiyāñ

qasr-e-zulmat par musalsal tiir barsātī huī

zad meñ koī chiiz aa jaa.e to us ko piis kar

irtiqā-e-zindagī ke raaz batlātī huī

zo.am meñ peshāni-e-sahrā pe Thokar mārtī

phir subuk-raftāriyoñ ke naaz dikhlātī huī

ek sarkash fauj kī sūrat alam khole hue

ek tūfānī garaj ke saath Darātī huī

ek ik harkat se andāz-e-baġhāvat āshkār

azmat-e-insāiyat ke zamzame gaatī huī

har qadam par top kī sī ghan-garaj ke saath saath

goliyoñ kī sansanāhaT kī sadā aatī huī

vo havā meñ saikaḌoñ jañgī duhal bajte hue

vo bigul kī jāñ-fazāñ āvāz lahrātī huī

al-ġharaz uḌtī chalī jaatī hai be-ḳhauf-o-ḳhatar

shā.ir-e-ātish-nafas kā ḳhuun khaulātī huī

phir chali hai rail station se lahraati hui

nim-shab ki KHamushi mein zer-e-lab gati hui

Dagmagati jhumti siTi bajati khelti

wadi o kohsar ki ThanDi hawa khati hui

tez jhonkon mein wo chham chham ka surud-e-dil-nashin

aandhiyon mein meinh barasne ki sada aati hui

jaise maujon ka tarannum jaise jal-pariyon ke git

ek ek lai mein hazaron zamzame gati hui

naunihaalon ko sunati miThi miThi loriyan

nazninon ko sunahre KHwab dikhlati hui

Thokaren kha kar lachakti gungunati jhumti

sarKHushi mein ghungruon ki tal par gati hui

naz se har moD par khati hui sau pech-o-KHam

ek dulhan apni ada se aap sharmati hui

raat ki tarikiyon mein jhilmilati kanpti

pTriyon par dur tak simab jhalkati hui

jaise aadhi raat ko nikli ho ek shahi baraat

shadyanon ki sada se wajd mein aati hui

muntashir kar ke faza mein ja-ba-ja chingariyan

daman-e-mauj-e-hawa mein phul barsati hui

tez-tar hoti hui manzil-ba-manzil dam-ba-dam

rafta rafta apna asli rup dikhlati hui

sina-e-kohsar par chaDhti hui be-iKHtiyar

ek nagan jis tarah masti mein lahraati hui

ek sitara TuT kar jaise rawan ho arsh se

rifat-e-kohsar se maidan mein aati hui

ek bagule ki tarah baDhti hui maidan mein

jangalon mein aandhiyon ka zor dikhlati hui

rasa-bar-andam karti anjum-e-shab-tab ko

aashiyan mein tair-e-wahshi ko chaunkati hui

yaad aa jae purane dewtaon ka jalal

un qayamat-KHeziyon ke sath bal khati hui

ek raKHsh-e-be-inan ki barq-raftari ke sath

KHandaqon ko phandti Tilon se katraati hui

murgh-zaron mein dikhati ju-e-shirin ka KHiram

wadiyon mein abr ke manind manDlati hui

ek pahaDi par dikhati aabshaaron ki jhalak

ek bayaban mein charagh-e-tur dikhlati hui

justuju mein manzil-e-maqsud ki diwana-war

apna sar dhunti faza mein baal bikhraati hui

chheDti ek wajd ke aalam mein saz-e-sarmadi

ghaiz ke aalam mein munh se aag barsati hui

rengti muDti machalti tilmilati hanpti

apne dil ki aatish pinhan ko bhaDkati hui

KHud-ba-KHud ruThi hui biphri hui bikhri hui

shor-e-paiham se dil-e-giti ko dhaDkati hui

pul pe dariya ke dama-dam kaundti lalkarti

apni is tufan-angezi pe itraati hui

pesh karti bich naddi mein charaghan ka saman

sahilon par ret ke zarron ko chamkati hui

munh mein ghusti hai surangon ke yakayak dauD kar

dandanati chiKHti chinghaDti gati hui

aage aage justuju-amez nazren Dalti

shab ke haibatnak nazzaron se ghabraati hui

ek mujrim ki tarah sahmi hui simTi hui

ek muflis ki tarah sardi mein tharraati hui

Tez-e-raftar ke sikke jamati ja-ba-ja

dasht o dar mein zindagi ki lahar dauDati hui

Dal kar guzre manazir par andhere ka naqab

ek naya manzar nazar ke samne lati hui

safha-e-dil se miTati ahd-e-mazi ke nuqush

haal o mustaqbil ke dilkash KHwab dikhlati hui

Dalti be-his chaTanon par haqarat ki nazar

koh par hansti falak ko aankh dikhlati hui

daman-e-tariki-e-shab ki uDati dhajjiyan

qasr-e-zulmat par musalsal tir barsati hui

zad mein koi chiz aa jae to us ko pis kar

irtiqa-e-zindagi ke raaz batlati hui

zoam mein peshani-e-sahra pe Thokar marti

phir subuk-raftariyon ke naz dikhlati hui

ek sarkash fauj ki surat alam khole hue

ek tufani garaj ke sath Daraati hui

ek ek harkat se andaz-e-baghawat aashkar

azmat-e-insaiyat ke zamzame gati hui

har qadam par top ki si ghan-garaj ke sath sath

goliyon ki sansanahaT ki sada aati hui

wo hawa mein saikaDon jangi duhal bajte hue

wo bigul ki jaan-fazan aawaz lahraati hui

al-gharaz uDti chali jati hai be-KHauf-o-KHatar

shair-e-atish-nafas ka KHun khaulati hui