rah-o-rasm-e-ashnai

zamīñ na.ī thii, falak nā-shanās thā jab ham

tirī galī se nikal kar sū-e-zamāna chale

nazar jhukā ke ba-andāz-e-mujrimāna chale

chale ba-jeb-e-darīda, ba-dāman-e-sad-chāk

ki jaise jins-e-dil-o-jāñ gañvā ke aa.e haiñ

tamām naqd-e-siyādat luTā ke aa.e haiñ

jahāñ ik umr kaTī thii, isī qalam-rau meñ

shanāḳht ke liye har shāhrāh ne Tokā

har ik nigāh ke neze ne rāsta rokā

jahāñ jale the tire husn-e-ātishīñ ke kañval

vahāñ alaav to kyaa, raakh kā nishāñ bhī na thā

charāġh-e-kushta-e-mahfil dhuāñ dhuāñ bhī na thā

musāfirat ne pukārā na.e ufuq kī taraf

agar vafā kī sharī.at kā ye sila hogā

na.e ufuq se ta.āruf ke ba.ad kyā hogā

zamin nai thi, falak na-shanas tha jab hum

teri gali se nikal kar su-e-zamana chale

nazar jhuka ke ba-andaz-e-mujrimana chale

chale ba-jeb-e-darida, ba-daman-e-sad-chaak

ki jaise jins-e-dil-o-jaan ganwa ke aae hain

tamam naqd-e-siyaadat luTa ke aae hain

jahan ek umr kaTi thi, isi qalam-rau mein

shanaKHt ke liye har shahrah ne Toka

har ek nigah ke neze ne rasta roka

jahan jale the tere husn-e-atishin ke kanwal

wahan alaw to kya, rakh ka nishan bhi na tha

charagh-e-kushta-e-mahfil dhuan dhuan bhi na tha

musafirat ne pukara nae ufuq ki taraf

agar wafa ki shariat ka ye sila hoga

nae ufuq se taaruf ke baad kya hoga