rail ka safar

darpesh achānak jo huī ek zarūrat

'vāhī' se huī rail pe chaḌhne kī himāqat

aa dhamkī zarā vaqt se pahle hī vo gaaḌī

'vāhī' ne ghaḌī dekhī to lāhaq huī hairat

hairat thī ki tājīl kī kyā vajah hai āḳhir

tāḳhīr to hai rail kī derīna rivāyat

al-qissa ticket manzil-e-maqsūd kā le kar

asbāb liye dauḌ ke pahuñchā vo ba-ujlat

aage se bhī pīchhe se bhī khātā huā dhakke

dāḳhil huā ik chhoTe se Dabbe meñ ba-diqqat

Dibbā thā ki ik ganj-e-shahīdāñ kā namūna

thoḌī sī jagah tang-tar az-gosha-e-turbat

turbat meñ magar paañv to phailāte haiñ murde

zindoñ ko nahīñ rail meñ us kī bhī suhūlat

asbāb pe baiThā thā koī Taañg aḌaa.e

khiḌkī pe khaḌā thā koī dīvār kī sūrat

is bhiiḌ meñ gunjā.ish-e-alfāz kahāñ thī

alfāz bhī hoñToñ se nikalte the ba-diqqat

thā dam-ba-ḳhud ik goshe meñ simTā huā 'vāhī'

kam-baḳht ko thī saañs ke lene kī zarūrat

aur saañs ke lene kā na thā koī bhī imkāñ

thī band havā oxygen kī thī ye qillat

the ek buzurg us ke muqābil meñ jo baiThe

dekhī na ga.ī un se jo 'vāhī' kī ye hālat

farmāne lage aap kahāñ jāoge bhayyā

bardāsht bhī kar pāoge raste kī sa.ūbat

ye rail nahīñ hazrat-e-'saudā' kī hai ghoḌī

daur-e-zamīñ tai kartī hai ik din kī masāfat

kal is ko pahuñchnā thā jahāñ aaj hai pahuñchī

chaubīs pahar laTe hai allāh re sur.at

maiñ apnī tabāhī kā bayāñ kyā karūñ bhayyā

paTna meñ thī kal mere muqaddame kī samā.at

paTna hai magar aaj bhī dillī kī tarah duur

rotī hai mirī shāmat-e-a.amāl ko qismat

ye sunte hī kaan us ke khaḌe ho ga.e fauran

kī arz ki ye aap ne kyā kah diyā hazrat

maiñ ne to ye samjhā thā ki hai vaqt pe aa.ī

chaubīs pahar laTe qayāmat hai qayāmat

bole vo buzurg aap baḌe saada haiñ bhayyā

ham log kisī kaam meñ karte nahīñ ujlat

ma.alūm nahīñ aap ko ye nukta-e-tārīḳh

jo qaum kī ḳhaslat hai na hī rail kī ḳhaslat

vo rail kī raftār ho yā vaqt kī raftār

is mulk meñ donoñ ko tasāhul kī hai aadat

pābandi-e-auqāt meñ hai shān-e-ġhulāmī

āzād huā hind to kyā is kī zarūrat

darpesh achanak jo hui ek zarurat

'wahi' se hui rail pe chaDhne ki himaqat

aa dhamki zara waqt se pahle hi wo gaDi

'wahi' ne ghaDi dekhi to lahaq hui hairat

hairat thi ki tajil ki kya wajah hai aaKHir

taKHir to hai rail ki derina riwayat

al-qissa ticket manzil-e-maqsud ka le kar

asbab liye dauD ke pahuncha wo ba-ujlat

aage se bhi pichhe se bhi khata hua dhakke

daKHil hua ek chhoTe se Dabbe mein ba-diqqat

Dibba tha ki ek ganj-e-shahidan ka namuna

thoDi si jagah tang-tar az-gosha-e-turbat

turbat mein magar panw to phailate hain murde

zindon ko nahin rail mein us ki bhi suhulat

asbab pe baiTha tha koi Tang aDae

khiDki pe khaDa tha koi diwar ki surat

is bhiD mein gunjaish-e-alfaz kahan thi

alfaz bhi honTon se nikalte the ba-diqqat

tha dam-ba-KHud ek goshe mein simTa hua 'wahi'

kam-baKHt ko thi sans ke lene ki zarurat

aur sans ke lene ka na tha koi bhi imkan

thi band hawa oxygen ki thi ye qillat

the ek buzurg us ke muqabil mein jo baiThe

dekhi na gai un se jo 'wahi' ki ye haalat

farmane lage aap kahan jaoge bhayya

bardasht bhi kar paoge raste ki saubat

ye rail nahin hazrat-e-'sauda' ki hai ghoDi

daur-e-zamin tai karti hai ek din ki masafat

kal is ko pahunchna tha jahan aaj hai pahunchi

chaubis pahar laTe hai allah re surat

main apni tabahi ka bayan kya karun bhayya

paTna mein thi kal mere muqaddame ki samaat

paTna hai magar aaj bhi dilli ki tarah dur

roti hai meri shamat-e-amal ko qismat

ye sunte hi kan us ke khaDe ho gae fauran

ki arz ki ye aap ne kya kah diya hazrat

main ne to ye samjha tha ki hai waqt pe aai

chaubis pahar laTe qayamat hai qayamat

bole wo buzurg aap baDe sada hain bhayya

hum log kisi kaam mein karte nahin ujlat

malum nahin aap ko ye nukta-e-tariKH

jo qaum ki KHaslat hai na hi rail ki KHaslat

wo rail ki raftar ho ya waqt ki raftar

is mulk mein donon ko tasahul ki hai aadat

pabandi-e-auqat mein hai shan-e-ghulami

aazad hua hind to kya is ki zarurat