رقص مسلسل

چلی جو چھوٹ کے زندان وقت سے آواز

عبور کر گئی ماضی کے بے کراں لمحے

پہنچ کے ازمنۂ قبل داستاں کے پرے

رکی تو نقش گر زیست سے سر آغاز

اچانک اس کی جھلک دیکھ کر یہ فرمایا

ابھی ہے ذرۂ خاکی میں جرأت پرواز

کہا ادب سے کہ اے کارساز کیا ہے یہ راز

کہ جس مقام پہ پہنچا یہی مقام آیا

کھلے تھے ہونٹ کہ آواز پھر سے ڈوب گئی

بلند ہونے لگے شعلہ ہائے گونا گوں

ہر ایک سمت سے اٹھی صدائے کن فیکون

ابھر رہی تھی بہر لمحہ کائنات نئی

ہنوز دہر میں گونج اس صدا کی ہے باقی

ابھی ہے رقص مسلسل میں روح آفاقی