rashhat

koī shāḳh-e-tishna-o-ḳhushk jis se harī na ho vo sahāb kyā

jo chhalak ke rañg na bhar sake rag-o-resha meñ vo shabāb kyā

dil-e-gum-shuda ko meñ DhūñDne kahīñ shab ko mahv-e-junūñ chalā

to sadā sī aa.ī ye siina se ki talāsh-e-ḳhāna-ḳharāb kyā

tarab-āfrīñ sahī rut kabhī mile bār-e-soz ko saaz meñ

na tanavvo itnā bhī jis kī tarz-e-navā meñ ho vo rabāb kyā

nahīñ phuul phuul mahak baġhair khile balā se khilā kare

ho mashām-e-tāza na jis kī rūh-e-shamīm se vo gulāb kyā

shikneñ ye sharm nihāñ kī haiñ nazar aa rahā hai jo parda sā

tahoñ meñ agar na hayā-e-jalva dabī huī to hijāb kyā

jo likhe the shauq se ḳhat unheñ faqat itnā un kā javāb thā

ki javāb aisī jasāratoñ kā sukūt ho to javāb kyā

jo pilā.ī hai to ye mastī-e-ma.e aish raat kā saath de

ho darāz tishna na jis kā sham.a ke bujhne tak vo sharāb kyā

koi shaKH-e-tishna-o-KHushk jis se hari na ho wo sahab kya

jo chhalak ke rang na bhar sake rag-o-resha mein wo shabab kya

dil-e-gum-shuda ko mein DhunDne kahin shab ko mahw-e-junun chala

to sada si aai ye sina se ki talash-e-KHana-KHarab kya

tarab-afrin sahi rut kabhi mile bar-e-soz ko saz mein

na tanawwo itna bhi jis ki tarz-e-nawa mein ho wo rabab kya

nahin phul phul mahak baghair khile bala se khila kare

ho masham-e-taza na jis ki ruh-e-shamim se wo gulab kya

shiknen ye sharm nihan ki hain nazar aa raha hai jo parda sa

tahon mein agar na haya-e-jalwa dabi hui to hijab kya

jo likhe the shauq se KHat unhen faqat itna un ka jawab tha

ki jawab aisi jasaraton ka sukut ho to jawab kya

jo pilai hai to ye masti-e-mae aish raat ka sath de

ho daraaz tishna na jis ka shama ke bujhne tak wo sharab kya