reip

maiñ apne andar kisī ḳhalā meñ bhaTak rahī thī

udhaḌ rahī thī

magar vahāñ sirf ik badan thā

jo nāḳhunoñ se vajūd se ruuh chhīltā thā

udhaḌtī sāñsoñ pe daañt apne chubho rahā thā

maiñ dard-e-zeh se bhī surḳh-rū ho ke aane vaalī

maiñ āshnā-e-aziyyat-e-taḳhlīq

ik tamasḳhur se

ek taz.hīk ke gumāñ se

ḳhud apnī aahaT kī siskiyoñ par

laraz rahī thī

darindagān-e-vajūd lekin

tamām rishtoñ kī gāliyoñ meñ

ḳhud apnī ta.amīr ke dho.eñ se

yaqīñ kī chādar chabā rahe the

vo dard-lamha

ḳharāsh ho kar guzar rahā thā

vahāñ faqat zabt mo.ajiza thā

ḳhudā kahīñ paas hī khaḌā thā

use kahāñ dard kā patā thā

meñ apne andar kisī ḳhalā meñ bhaTak rahī thī

udhaḌ rahī thī

main apne andar kisi KHala mein bhaTak rahi thi

udhaD rahi thi

magar wahan sirf ek badan tha

jo naKHunon se wajud se ruh chhilta tha

udhaDti sanson pe dant apne chubho raha tha

main dard-e-zeh se bhi surKH-ru ho ke aane wali

main aashna-e-aziyyat-e-taKHliq

ek tamasKHur se

ek tazhik ke guman se

KHud apni aahaT ki siskiyon par

laraz rahi thi

darindagan-e-wajud lekin

tamam rishton ki galiyon mein

KHud apni tamir ke dhoen se

yaqin ki chadar chaba rahe the

wo dard-lamha

KHarash ho kar guzar raha tha

wahan faqat zabt moajiza tha

KHuda kahin pas hi khaDa tha

use kahan dard ka pata tha

mein apne andar kisi KHala mein bhaTak rahi thi

udhaD rahi thi