sal-girah ki raat

vaqt kī baat hai har ġhuncha-e-sar-basta magar

vaqt kyā chiiz hai paimāna-e-be-sāḳhta hai

ye shab-o-roz javānī ye mah-o-sāl ravāñ

ruuh kyuuñ jism ke aage siper-andāḳhta hai

shāḳh dar shāḳh nazar aatī hai jiine kī umañg

chor kī tarah saraktī hai ragoñ meñ koī aag

sochne ke liye shāyad ye mah-o-sāl nahīñ

ai mire dīda-e-be-ḳhvāb mohabbat se na bhaag

husn kī aag ġhanīmat hai ki is se pahle

rag-e-ayyām thī ik jū-e-fasurda sar-e-shām

sab isī aag kā īñdhan haiñ guzarne vaale

ek hī larzish-e-sad-rañg kā partav hai tamām

waqt ki baat hai har ghuncha-e-sar-basta magar

waqt kya chiz hai paimana-e-be-saKHta hai

ye shab-o-roz jawani ye mah-o-sal rawan

ruh kyun jism ke aage siper-andaKHta hai

shaKH dar shaKH nazar aati hai jine ki umang

chor ki tarah sarakti hai ragon mein koi aag

sochne ke liye shayad ye mah-o-sal nahin

ai mere dida-e-be-KHwab mohabbat se na bhag

husn ki aag ghanimat hai ki is se pahle

rag-e-ayyam thi ek ju-e-fasurda sar-e-sham

sab isi aag ka indhan hain guzarne wale

ek hi larzish-e-sad-rang ka partaw hai tamam