sal ki aaKHiri shab

saal kī āḳhirī shab

mere kamre meñ kitāboñ kā hujūm

pichhlī rātoñ ko tarāshe hue kuchh maah o nujūm

maiñ akelā mire atrāf uluum

ek tasvīr pe bante hue mere ḳhad-o-ḳhāl

in pe jamtī huī gard-e-mah-o-sāl

ik hayūlā sā pas-e-shahr-e-ġhubār

aur mujhe jakḌe hue ḳhud mirī bāhoñ ke hisār

koī rauzan hai na dar

so ga.e ahl-e-ḳhabar

saal kī āḳhirī shab

na kisī hijr kā sadma na kisī vasl kā ḳhvāb

ḳham hone ko hai bas āḳhirī lamhe kā shabāb

aur ufuq paar dhuñdlakoñ se kaheñ

khulne vaalā hai na.ī sub.h kā baab

is na.ī sub.h ko kyā nazr karūñ

har taraf phailā huā tez havāoñ kā fusūñ

aur maiñ sochtā huuñ

dar-o-dīvār meñ lipTe hue sahme hue log

galī-kūchoñ meñ nikalte hue ghabrāte hue

maiñ unheñ kaise batā.ūñ ki yahī mausam hai

jab parindoñ ke par-o-bāl nikal aate haiñ

sal ki aaKHiri shab

mere kamre mein kitabon ka hujum

pichhli raaton ko tarashe hue kuchh mah o nujum

main akela mere atraf ulum

ek taswir pe bante hue mere KHad-o-KHal

in pe jamti hui gard-e-mah-o-sal

ek hayula sa pas-e-shahr-e-ghubar

aur mujhe jakDe hue KHud meri bahon ke hisar

koi rauzan hai na dar

so gae ahl-e-KHabar

sal ki aaKHiri shab

na kisi hijr ka sadma na kisi wasl ka KHwab

KHam hone ko hai bas aaKHiri lamhe ka shabab

aur ufuq par dhundlakon se kahen

khulne wala hai nai subh ka bab

is nai subh ko kya nazr karun

har taraf phaila hua tez hawaon ka fusun

aur main sochta hun

dar-o-diwar mein lipTe hue sahme hue log

gali-kuchon mein nikalte hue ghabraate hue

main unhen kaise bataun ki yahi mausam hai

jab parindon ke par-o-baal nikal aate hain