sanp siDhi

vo saañp sīḌhī kā khel thā jo

ham ahd-e-tiflī meñ khelte the

agarche sāñpoñ se ghir bhī jaate

jo koī un meñ se Das bhī letā

to vāpas apnī jagah pe jaate

vo zahr hotā thā utnā halkā

ki mar na paate

phir apnī jidd-o-jahd kī ḳhātir

ham uTh ke qismat ko āzmāte

aur aisā hotā bhī thā ki aksar

hameñ vo sīḌhī milī hai jis se

bulandiyoñ par pahuñch ga.e haiñ

magar na jaane ki saañp sīḌhī kā

ab ye kaisā hai khel niklā

ki chaar samtoñ meñ saañp haiñ bas

jo apne phan ko uThā.e uupar

har ek lamha Darā rahe haiñ

kahīñ bhī sīḌhī nahīñ hai koī

wo sanp siDhi ka khel tha jo

hum ahd-e-tifli mein khelte the

agarche sanpon se ghir bhi jate

jo koi un mein se Das bhi leta

to wapas apni jagah pe jate

wo zahr hota tha utna halka

ki mar na pate

phir apni jidd-o-jahd ki KHatir

hum uTh ke qismat ko aazmate

aur aisa hota bhi tha ki aksar

hamein wo siDhi mili hai jis se

bulandiyon par pahunch gae hain

magar na jaane ki sanp siDhi ka

ab ye kaisa hai khel nikla

ki chaar samton mein sanp hain bas

jo apne phan ko uThae upar

har ek lamha Dara rahe hain

kahin bhi siDhi nahin hai koi