sathi

Duub jaatā thā sūraj har ik shaam ko

raushnī chāñd kī thī faqat naam ko

āsmāñ pe sitāre chamakte bhī the

sirf un ke liye

jin ke ghar meñ hazāroñ diye ghī ke jalte the aur jo khulī chhat pe takte the tāroñ ko bas dil-lagī ke liye

un sitāroñ kī kirneñ kabhī merī copy qalam aur kitāboñ ko itnī na thiiñ

jin se maiñ paḌh sakūñ

kaam kuchh kar sakūñ

mere ghar meñ añdherā añdherā añdherā thā bas

añdheroñ ke pardoñ se gar jhāñktā thā koī to vo thī lālTain

ik hasīñ mah-jabīñ

Tiin kī vo banī taar se vo juḌī

tīrgī meñ mire saath har dam khaḌī

tohfa-e-nūr kā ik ḳhazāna liye

aur 'evaz meñ use chāhiye thā faqat tel miTTī kā

us kī lau kī hifāzat kī ḳhātir jo dīvār thī

vo thī shīshe kī

chaar aane ke shīshe meñ lekin bahut zor thā

vo havāoñ se laḌtā jhagaḌtā unheñ maat detā ka.ī zaḳhm khātā

magar chaar paise kī battī kī lau ko vo bujhne na detā

ki maiñ paḌh sakūñ

kaam kuchh kar sakūñ

aaj maiñ huuñ jahāñ nuur hī nuur hai

raushnī kā samundar hai bikhrā huā

chāñd tāroñ kī chādar hai sar par mire

aur mirī lālTain kahīñ bhī nahīñ

par kise hai ḳhabar

mere bachpan kī sāthī yahīñ hai kahīñ

mujh meñ vo dafn hai

Dub jata tha suraj har ek sham ko

raushni chand ki thi faqat nam ko

aasman pe sitare chamakte bhi the

sirf un ke liye

jin ke ghar mein hazaron diye ghi ke jalte the aur jo khuli chhat pe takte the taron ko bas dil-lagi ke liye

un sitaron ki kirnen kabhi meri copy qalam aur kitabon ko itni na thin

jin se main paDh sakun

kaam kuchh kar sakun

mere ghar mein andhera andhera andhera tha bas

andheron ke pardon se gar jhankta tha koi to wo thi lalTain

ek hasin mah-jabin

Tin ki wo bani tar se wo juDi

tirgi mein mere sath har dam khaDi

tohfa-e-nur ka ek KHazana liye

aur 'ewaz mein use chahiye tha faqat tel miTTi ka

us ki lau ki hifazat ki KHatir jo diwar thi

wo thi shishe ki

chaar aane ke shishe mein lekin bahut zor tha

wo hawaon se laDta jhagaDta unhen mat deta kai zaKHm khata

magar chaar paise ki batti ki lau ko wo bujhne na deta

ki main paDh sakun

kaam kuchh kar sakun

aaj main hun jahan nur hi nur hai

raushni ka samundar hai bikhra hua

chand taron ki chadar hai sar par mere

aur meri lalTain kahin bhi nahin

par kise hai KHabar

mere bachpan ki sathi yahin hai kahin

mujh mein wo dafn hai