sab jaante hain ilm se hai zindagi ki ruh

sab jānte haiñ ilm se hai zindagī kī ruuh

be-ilm hai agar to vo insāñ hai nā tamām

be-ilm-o-be-hunar hai jo duniyā meñ koī qaum

nature kā iqtizā hai rahe ban ke vo ġhulām

ta.alīm agar nahīñ hai zamāne ke hasb-o-hāl

phir kyā umīd-e-daulat-o-ārām-o-ihterām

sayyad ke dil meñ naqsh ho is ḳhayāl kā

Daalī binā-e-madrasa le kar ḳhudā kā naam

sadme uThā.e ranj sahe gāliyāñ sunīñ

lekin na chhoḌā qaum ke ḳhādim ne ye kaam

dikhlā diyā zamāne ko zor-e-dil-o-dimāġh

batlā diyā vo karte haiñ karne vaale kaam

niyyat jo thī ba-ḳhair to barkat ḳhudā ne dī

collage huā durust ba-sad shān-o-ehtishām

sarmā.e meñ kamī thī sahārā koī na thā

sayyad kā dil thā darpai takmīl-e-intizām

āḳhir uThā safar ko vo mard ḳhasta paye

ahbāb chand saath the zī-ilm-o-ḳhush-kalām

qismat ki rahbarī se milī manzil-e-murād

farmāñ-ravā-e-mulk-e-dakan ko kiyā salām

hālat dikhā.ī aur zarūrat bayān kī

ḳhūbī se iltimās kiyā qaum kā payām

rahm aa gayā huzūr ko hālat pe qaum kī

phir kyā thā maujzan huā dariyā-e-faiz-e-ām

māhāna do hazār kiyā ik hazār se

ummīd se ziyāda atā thī ye lā-kalām

'akbar' kī ye duā hai ḳhudā kī janāb meñ

tā-hashr is ra.īs-o-riyāsat ko ho qayām

kyā vaqt par huī hai ki be-ehtijjaj-e-fikr

tārīk apnī aap hai fayyazī-e-nizām

sab jaante hain ilm se hai zindagi ki ruh

be-ilm hai agar to wo insan hai na tamam

be-ilm-o-be-hunar hai jo duniya mein koi qaum

nature ka iqtiza hai rahe ban ke wo ghulam

talim agar nahin hai zamane ke hasb-o-haal

phir kya umid-e-daulat-o-aram-o-ihteram

sayyad ke dil mein naqsh ho is KHayal ka

Dali bina-e-madrasa le kar KHuda ka nam

sadme uThae ranj sahe galiyan sunin

lekin na chhoDa qaum ke KHadim ne ye kaam

dikhla diya zamane ko zor-e-dil-o-dimagh

batla diya wo karte hain karne wale kaam

niyyat jo thi ba-KHair to barkat KHuda ne di

collage hua durust ba-sad shan-o-ehtisham

sarmae mein kami thi sahaara koi na tha

sayyad ka dil tha darpai takmil-e-intizam

aaKHir uTha safar ko wo mard KHasta paye

ahbab chand sath the zi-ilm-o-KHush-kalam

qismat ki rahbari se mili manzil-e-murad

farman-rawa-e-mulk-e-dakan ko kiya salam

haalat dikhai aur zarurat bayan ki

KHubi se iltimas kiya qaum ka payam

rahm aa gaya huzur ko haalat pe qaum ki

phir kya tha maujzan hua dariya-e-faiz-e-am

mahana do hazar kiya ek hazar se

ummid se ziyaada ata thi ye la-kalam

'akbar' ki ye dua hai KHuda ki janab mein

ta-hashr is rais-o-riyasat ko ho qayam

kya waqt par hui hai ki be-ehtijjaj-e-fikr

tarik apni aap hai fayyazi-e-nizam