sab maya hai

sab maayā hai, sab Dhaltī phirtī chhāyā hai

is ishq meñ ham ne jo khoyā jo paayā hai

jo tum ne kahā hai, 'faiz' ne jo farmāyā hai

sab maayā hai

haañ gaahe gaahe diid kī daulat haath aa.ī

yā ek vo lazzat naam hai jis kā rusvā.ī

bas is ke sivā to jo bhī savāb kamāyā hai

sab maayā hai

ik naam to baaqī rahtā hai, gar jaan nahīñ

jab dekh liyā is saude meñ nuqsān nahīñ

tab sham.a pe dene jaan patiñgā aayā hai

sab maayā hai

ma.alūm hameñ sab qais miyāñ kā qissa bhī

sab ek se haiñ, ye rāñjhā bhī ye 'inshā' bhī

farhād bhī jo ik nahr sī khod ke laayā hai

sab maayā hai

kyuuñ dard ke naame likhte likhte raat karo

jis saat samundar paar kī naar kī baat karo

us naar se koī ek ne dhokā khāyā hai?

sabab maayā hai

jis gorī par ham ek ġhazal har shaam likheñ

tum jānte ho ham kyūñkar us kā naam likheñ

dil us kī bhī chaukhaT chuum ke vāpas aayā hai

sab maayā hai

vo laḌkī bhī jo chāñd-nagar kī raanī thī

vo jis kī alhaḌ āñkhoñ meñ hairānī thī

aaj us ne bhī paiġhām yahī bhijvāyā hai

sab maayā hai

jo log abhī tak naam vafā kā lete haiñ

vo jaan ke dhoke khāte, dhoke dete haiñ

haañ Thok-bajā kar ham ne hukm lagāyā hai

sab maayā hai

jab dekh liyā har shaḳhs yahāñ harjā.ī hai

is shahr se duur ik kuTiyā ham ne banā.ī hai

aur us kuTiyā ke māthe par likhvāyā hai

sab maayā hai

sab maya hai, sab Dhalti phirti chhaya hai

is ishq mein hum ne jo khoya jo paya hai

jo tum ne kaha hai, 'faiz' ne jo farmaya hai

sab maya hai

han gahe gahe did ki daulat hath aai

ya ek wo lazzat nam hai jis ka ruswai

bas is ke siwa to jo bhi sawab kamaya hai

sab maya hai

ek nam to baqi rahta hai, gar jaan nahin

jab dekh liya is saude mein nuqsan nahin

tab shama pe dene jaan patinga aaya hai

sab maya hai

malum hamein sab qais miyan ka qissa bhi

sab ek se hain, ye ranjha bhi ye 'insha' bhi

farhad bhi jo ek nahr si khod ke laya hai

sab maya hai

kyun dard ke name likhte likhte raat karo

jis sat samundar par ki nar ki baat karo

us nar se koi ek ne dhoka khaya hai?

sabab maya hai

jis gori par hum ek ghazal har sham likhen

tum jaante ho hum kyunkar us ka nam likhen

dil us ki bhi chaukhaT chum ke wapas aaya hai

sab maya hai

wo laDki bhi jo chand-nagar ki rani thi

wo jis ki alhaD aankhon mein hairani thi

aaj us ne bhi paigham yahi bhijwaya hai

sab maya hai

jo log abhi tak nam wafa ka lete hain

wo jaan ke dhoke khate, dhoke dete hain

han Thok-baja kar hum ne hukm lagaya hai

sab maya hai

jab dekh liya har shaKHs yahan harjai hai

is shahr se dur ek kuTiya hum ne banai hai

aur us kuTiya ke mathe par likhwaya hai

sab maya hai