salam

garche likhī huī thī shahādat imaam kī

lekin mere husain ne hujjat tamām kī

zainab kī be-ridā.ī ne sar merā Dhak diyā

āġhāz-e-sub.h-e-nau huī vo shaam shaam kī

ik ḳhvāb-e-ḳhās chashm-e-mohammad meñ thā chhupā

ta.abīr nūr-e-ain-e-mohammad ne aam kī

bachchoñ kī pyaas mālik-e-kausar pe shaaq thī

saaqī ko varna mai kī zarūrat na jaam kī

hur sā nasīb bādshahoñ ko nahīñ nasīb

aaqā se mil rahī thī gavāhī ġhulām kī

dariyā pe tishna-lab haiñ pe sahrā meñ shād-kām

duniyā ajab hai un ke safar aur qayām kī

de kar razā jo chehra-e-shabbīr zard hai

thī iltijā-e-jang ye kis lāla-fām kī

garche likhi hui thi shahadat imam ki

lekin mere husain ne hujjat tamam ki

zainab ki be-ridai ne sar mera Dhak diya

aaghaz-e-subh-e-nau hui wo sham sham ki

ek KHwab-e-KHas chashm-e-mohammad mein tha chhupa

tabir nur-e-ain-e-mohammad ne aam ki

bachchon ki pyas malik-e-kausar pe shaq thi

saqi ko warna mai ki zarurat na jam ki

hur sa nasib baadshahon ko nahin nasib

aaqa se mil rahi thi gawahi ghulam ki

dariya pe tishna-lab hain pe sahra mein shad-kaam

duniya ajab hai un ke safar aur qayam ki

de kar raza jo chehra-e-shabbir zard hai

thi iltija-e-jang ye kis lala-fam ki