samundar aasman aur main

khulīñ jo āñkheñ to sar pe niilā falak tanā thā

chahār-jānib siyāh paanī kī tund maujoñ kā ġhalġhala thā

havā.eñ chīḳhoñ ko aur karāhoñ ko le ke chaltī thiiñ aur miTTī

kī zard ḳhushbū meñ maut-mausam kā zā.iqa thā

nazar manāzir meñ Duub kar bhī misāl-e-shīsha tahī thī yaanī

gul-e-tamāshā nahīñ khilā thā

hirās jazboñ kī rahguzar meñ dil-e-ta.ajjub-zada akelā

ḳhamosh tanhā bhaTak rahā thā

ki ek saa.e kī narm aahaT ne rāstoñ kā nasīb badlā

koī ta.alluq ke chāñd lahje meñ apne-pan kī adā se bolā

''mire musāfir udaas mat ho ki ahd-e-furqat hī zindagī hai

ye fāsloñ kī ḳhalīj rāh-e-visāl hai aur talab nigāhoñ kī raushnī hai

tamām chīzeñ tumhāre mere

badan ke rishtoñ kā silsila haiñ

tumheñ ḳhabar hai ki ham samundar

aur āsmānoñ kī intihā haiñ!''

khulin jo aankhen to sar pe nila falak tana tha

chahaar-jaanib siyah pani ki tund maujon ka ghalghala tha

hawaen chiKHon ko aur karahon ko le ke chalti thin aur miTTi

ki zard KHushbu mein maut-mausam ka zaiqa tha

nazar manazir mein Dub kar bhi misal-e-shisha tahi thi yani

gul-e-tamasha nahin khila tha

hiras jazbon ki rahguzar mein dil-e-tajjub-zada akela

KHamosh tanha bhaTak raha tha

ki ek sae ki narm aahaT ne raston ka nasib badla

koi talluq ke chand lahje mein apne-pan ki ada se bola

mire musafir udas mat ho ki ahd-e-furqat hi zindagi hai

ye faslon ki KHalij rah-e-visal hai aur talab nigahon ki raushni hai

tamam chizen tumhaare mere

badan ke rishton ka silsila hain

tumhein KHabar hai ki hum samundar

aur aasmanon ki intiha hain!