sayyad se aaj hazrat-e-waiz ne ye kaha

sayyad se aaj hazrat-e-vā.iz ne ye kahā

charchā hai jā-ba-jā tire hāl-e-tabāh kā

samjhā hai tū ne nature o tadbīr ko ḳhudā

dil meñ zarā asar na rahā lā-ilāh kā

ho tujh se tark-e-saum-o-salāt-o-zakāt-o-haj

kuchh Dar nahīñ janāb-e-risālat-panāh kā

shaitān ne dikhā ke jamāl-e-urūs-e-dahr

banda banā diyā hai tujhe hubb-e-jāh kā

us ne diyā javāb ki maz.hab ho yā rivāj

rāhat meñ jo muḳhil ho vo kāñTā hai raah kā

afsos hai ki aap haiñ duniyā se be-ḳhabar

kyā jāniye jo rañg hai shām-o-pagāh kā

europe kā pesh aa.e agar aap ko safar

guzre nazar se haal re.āyā-o-shāh kā

vo āb-o-tāb-o-shaukat-e-aivān-e-khusravī

vo mahakmoñ kī shaan vo jalva sipāh kā

aa.e nazar ulūm-e-jadīdah kī raushnī

jis se ḳhajil ho nuur ruḳh-e-mehr-o-māh kā

dāvat kisī amiir ke ghar meñ ho aap kī

kam-sin misoñ se zikr ho ulfat kā chaah kā

nau-ḳhez dil-fareb gul-andām nāznīñ

aariz pe jin ke baar ho dāman nigāh kā

rukiye agar to hañs ke kahe ik but-e-hasīñ

sun maulvī ye baat nahīñ hai gunāh kā

us vaqt qibla jhuk ke karūñ aap ko salām

phir naam bhī huzūr jo leñ ḳhānqāh kā

patlūn-o-koT-o-bañgla-o-biscuit kī dhun bañdhe

saudā janāb ko bhī ho turkī kulāh kā

mimbar pe yuuñ to baiTh ke goshe meñ ai janāb

sab jānte haiñ va.az savāb-o-gunāh kā

sayyad se aaj hazrat-e-waiz ne ye kaha

charcha hai ja-ba-ja tere haal-e-tabah ka

samjha hai tu ne nature o tadbir ko KHuda

dil mein zara asar na raha la-ilah ka

ho tujh se tark-e-saum-o-salat-o-zakat-o-haj

kuchh Dar nahin janab-e-risalat-panah ka

shaitan ne dikha ke jamal-e-urus-e-dahr

banda bana diya hai tujhe hubb-e-jah ka

us ne diya jawab ki mazhab ho ya riwaj

rahat mein jo muKHil ho wo kanTa hai rah ka

afsos hai ki aap hain duniya se be-KHabar

kya jaaniye jo rang hai sham-o-pagah ka

europe ka pesh aae agar aap ko safar

guzre nazar se haal reaya-o-shah ka

wo aab-o-tab-o-shaukat-e-aiwan-e-khusrawi

wo mahakmon ki shan wo jalwa sipah ka

aae nazar ulum-e-jadidah ki raushni

jis se KHajil ho nur ruKH-e-mehr-o-mah ka

dawat kisi amir ke ghar mein ho aap ki

kam-sin mison se zikr ho ulfat ka chah ka

nau-KHez dil-fareb gul-andam naznin

aariz pe jin ke bar ho daman nigah ka

rukiye agar to hans ke kahe ek but-e-hasin

sun maulwi ye baat nahin hai gunah ka

us waqt qibla jhuk ke karun aap ko salam

phir nam bhi huzur jo len KHanqah ka

patlun-o-koT-o-bangla-o-biscuit ki dhun bandhe

sauda janab ko bhi ho turki kulah ka

mimbar pe yun to baiTh ke goshe mein ai janab

sab jaante hain waz sawab-o-gunah ka