self made logon ka alamiya

self made logoñ kā alamiya

raushnī mizājoñ kā kyā ajab muqaddar hai

zindagī ke raste meñ bichhne vaale kāñToñ ko

raah se haTāne meñ

ek ek tinke se āshiyāñ banāne meñ

ḳhushbueñ pakaḌne meñ gulistāñ sajāne meñ

umr kaaT dete haiñ

umr kaaT dete haiñ

aur apne hisse ke phuul baañT dete haiñ

kaisī kaisī ḳhvāhish ko qatl karte jaate haiñ

darguzar ke gulshan meñ abr ban ke rahte haiñ

sabr ke samundar meñ kashtiyāñ chalāte haiñ

ye nahīñ ki un ko is roz-o-shab kī kāhish kā

kuchh sila nahīñ miltā

marne vaalī aasoñ kā ḳhūñ-bahā nahīñ miltā

zindagī ke dāman meñ jis qadar bhī ḳhushiyāñ haiñ

sab hī haath aatī haiñ

sab hī mil bhī jaatī haiñ

vaqt par nahīñ miltīñ vaqt par nahīñ ātīñ

yaanī un ko mehnat kā ajr mil to jaatā hai

lekin is tarah jaise

qarz kī raqam koī qist qist ho jaa.e

asl jo ibārat ho pas navisht ho jaa.e

fasl-e-gul ke āḳhir meñ phuul un ke khulte haiñ

un ke sahn meñ sūraj der meñ nikalte haiñ

self made logon ka alamiya

raushni mizajon ka kya ajab muqaddar hai

zindagi ke raste mein bichhne wale kanTon ko

rah se haTane mein

ek ek tinke se aashiyan banane mein

KHushbuen pakaDne mein gulistan sajaane mein

umr kaT dete hain

umr kaT dete hain

aur apne hisse ke phul banT dete hain

kaisi kaisi KHwahish ko qatl karte jate hain

darguzar ke gulshan mein abr ban ke rahte hain

sabr ke samundar mein kashtiyan chalate hain

ye nahin ki un ko is roz-o-shab ki kahish ka

kuchh sila nahin milta

marne wali aason ka KHun-baha nahin milta

zindagi ke daman mein jis qadar bhi KHushiyan hain

sab hi hath aati hain

sab hi mil bhi jati hain

waqt par nahin miltin waqt par nahin aatin

yani un ko mehnat ka ajr mil to jata hai

lekin is tarah jaise

qarz ki raqam koi qist qist ho jae

asl jo ibarat ho pas nawisht ho jae

fasl-e-gul ke aaKHir mein phul un ke khulte hain

un ke sahn mein suraj der mein nikalte hain