shayad ki bahaar aai

baiThe baiThe safedī pe tārīḳhī kirnoñ kā gherā khulā

lambī shāḳhoñ ke saa.e zamīñ par gire

saañs meñ purza purza huā

baas ban kar khulī

mere kamre kī khiḌkī se bāhar bahār aa ga.ī

yā shāyad thakan aur añdhere meñ karvaT badalte hue

maiñ ne sapne meñ dekhā

bahār aa ga.ī

ek bhūle hue saal ke chāñd kī raushnī

mere hāthoñ pe hai

aise alfāz jaise mohabbat badan

ruuh aur dil kī pahnā.iyāñ

aise alfāz bhī jaise

ghar rāsta manzileñ

ūñche ūñche daraḳhtoñ ke patte

hamesha hamesha tar-o-tāza sabza

meñ bīmār huuñ mere hāthoñ meñ ra.asha hai

Tāñgoñ se pinjar udhaḌtā chalā jā rahā hai

yahāñ kaun dekhe

zamāne kā andher

āñkhoñ meñ pighlī huī faal

din aage pīchhe haiñ tālāb meñ bachche paanī uḌāte haiñ jaise

phisalte haiñ mauhūm mauhūm

kabhī ūñghte meñ vo saare manāzir

jo dāman ko khole hue mere pahlū meñ haiñ

mere hāthoñ se gir jaate haiñ

ek jhoñkā kitāboñ ke aurāq meñ

raat bhar jāgtā hai

raat bhar niiñd halkore detī hai

bistar pe leTā huuñ kitne hī bistar qatāroñ meñ aage

bichhe haiñ

maiñ har ek bistar pe leTā huuñ

dinoñ ke sahāre

maiñ maazī kī railing se lag kar khaḌā

lambe hāthoñ kī larzish se

is ke badan ko havā kī tarah chhū ke aage nikal jaatā huuñ

itnī sadiyoñ kī galiyoñ meñ raqsā barahna

jo maiñ huuñ

nahīñ huuñ

baiThe baiThe safedi pe tariKHi kirnon ka ghera khula

lambi shaKHon ke sae zamin par gire

sans mein purza purza hua

bas ban kar khuli

mere kamre ki khiDki se bahar bahaar aa gai

ya shayad thakan aur andhere mein karwaT badalte hue

main ne sapne mein dekha

bahaar aa gai

ek bhule hue sal ke chand ki raushni

mere hathon pe hai

aise alfaz jaise mohabbat badan

ruh aur dil ki pahnaiyan

aise alfaz bhi jaise

ghar rasta manzilen

unche unche daraKHton ke patte

hamesha hamesha tar-o-taza sabza

mein bimar hun mere hathon mein rasha hai

Tangon se pinjar udhaDta chala ja raha hai

yahan kaun dekhe

zamane ka andher

aankhon mein pighli hui fal

din aage pichhe hain talab mein bachche pani uDate hain jaise

phisalte hain mauhum mauhum

kabhi unghte mein wo sare manazir

jo daman ko khole hue mere pahlu mein hain

mere hathon se gir jate hain

ek jhonka kitabon ke auraq mein

raat bhar jagta hai

raat bhar nind halkore deti hai

bistar pe leTa hun kitne hi bistar qataron mein aage

bichhe hain

main har ek bistar pe leTa hun

dinon ke sahaare

main mazi ki railing se lag kar khaDa

lambe hathon ki larzish se

is ke badan ko hawa ki tarah chhu ke aage nikal jata hun

itni sadiyon ki galiyon mein raqsa barahna

jo main hun

nahin hun