shabana

ye aa.e din ke hañgāme

ye jab dekho safar karnā

yahāñ jaanā vahāñ jaanā

ise milnā use milnā

hamāre saare lamhe

aise lagte haiñ

ki jaise train ke chalne se pahle

railway-station par

jaldī jaldī apne Dabbe DhūñDte

koī musāfir hoñ

jinheñ kab saañs bhī lene kī mohlat hai

kabhī lagtā hai

tum ko mujh se mujh ko tum se milne kā

ḳhayāl aa.e

kahāñ itnī bhī fursat hai

magar jab sañg-dil duniyā merā dil toḌtī hai to

koī ummīd chalte chalte

jab muñh moḌtī hai to

kabhī koī ḳhushī kā phuul

jab is dil meñ khiltā hai

kabhī jab mujh ko apne zehn se

koī ḳhayāl in.aam miltā hai

kabhī jab ik tamannā puurī hone se

ye dil ḳhālī sā hotā hai

kabhī jab dard aa ke palkoñ pe motī pirotā hai

to ye ehsās hotā hai

ḳhushī ho ġham ho hairat ho

koī jazba ho

is meñ jab kahīñ ik moḌ aa.e to

vahāñ pal bhar ko

saarī duniyā pīchhe chhūT jaatī hai

vahāñ pal bhar ko

is kaTh-putlī jaisī zindagī kī

Dorī TuuT jaatī hai

mujhe us moḌ par

bas ik tumhārī hī zarūrat hai

magar ye zindagī kī ḳhūbsūrat ik haqīqat hai

ki merī raah meñ jab aisā koī moḌ aayā hai

to har us moḌ par maiñ ne

tumheñ ham-rāh paayā hai

ye aae din ke hangame

ye jab dekho safar karna

yahan jaana wahan jaana

ise milna use milna

hamare sare lamhe

aise lagte hain

ki jaise train ke chalne se pahle

railway-station par

jaldi jaldi apne Dabbe DhunDte

koi musafir hon

jinhen kab sans bhi lene ki mohlat hai

kabhi lagta hai

tum ko mujh se mujh ko tum se milne ka

KHayal aae

kahan itni bhi fursat hai

magar jab sang-dil duniya mera dil toDti hai to

koi ummid chalte chalte

jab munh moDti hai to

kabhi koi KHushi ka phul

jab is dil mein khilta hai

kabhi jab mujh ko apne zehn se

koi KHayal inam milta hai

kabhi jab ek tamanna puri hone se

ye dil KHali sa hota hai

kabhi jab dard aa ke palkon pe moti pirota hai

to ye ehsas hota hai

KHushi ho gham ho hairat ho

koi jazba ho

is mein jab kahin ek moD aae to

wahan pal bhar ko

sari duniya pichhe chhuT jati hai

wahan pal bhar ko

is kaTh-putli jaisi zindagi ki

Dori TuT jati hai

mujhe us moD par

bas ek tumhaari hi zarurat hai

magar ye zindagi ki KHubsurat ek haqiqat hai

ki meri rah mein jab aisa koi moD aaya hai

to har us moD par main ne

tumhein ham-rah paya hai