shanasai

lauT bhī aa.eñ agar ab

vo shanāsā lamhe

aur maiñ tujh se milūñ bhī

to dabe lafzoñ meñ

pūchheñge sabhī

kin sitāroñ kī guzargāh pe tum pahle-pahal nikle the

kaun sī jhiil thī vo

jis meñ tum pahle-pahal Duube the

kaun se peḌ the vo

jin ke sāyoñ meñ

mohabbat ke shagūfe phūTe

itne badle hue hālāt ke dorāhe par

in savāloñ ke javābāt meñ kaise dūñgā

ajnabī ban ke milūñgā

to koī pūchh na le

ye jo āñkhoñ meñ

mohabbat kā ravāñ hai dariyā

us kī kis mauj se

rishta hai shanāsā.ī kā

us ko Dar kaisā hai rusvā.ī kā

aur agar

tujh se na milne kī qasam khā.ūñ

to phir

dil kī har rag se lahū Tapkegā tanhā.ī kā

maiñ sahe jā.ūñgā ye zaḳhm shanāsā.ī kā

lauT bhi aaen agar ab

wo shanasa lamhe

aur main tujh se milun bhi

to dabe lafzon mein

puchhenge sabhi

kin sitaron ki guzargah pe tum pahle-pahal nikle the

kaun si jhil thi wo

jis mein tum pahle-pahal Dube the

kaun se peD the wo

jin ke sayon mein

mohabbat ke shagufe phuTe

itne badle hue haalat ke dorahe par

in sawalon ke jawabaat mein kaise dunga

ajnabi ban ke milunga

to koi puchh na le

ye jo aankhon mein

mohabbat ka rawan hai dariya

us ki kis mauj se

rishta hai shanasai ka

us ko Dar kaisa hai ruswai ka

aur agar

tujh se na milne ki qasam khaun

to phir

dil ki har rag se lahu Tapkega tanhai ka

main sahe jaunga ye zaKHm shanasai ka