shimle ki rail-gaDi

solan kī choTiyoñ se

jhanḌī hilā rahī hai

ġhusse meñ be-tahāshā

siiTī bajā rahī hai

dekho vo aa rahī hai

shimle kī rail-gāḌī

do enginoñ ke muñh se

sho.ale nikal rahe haiñ

do naag mil ke goyā

dozaḳh ugal rahe haiñ

āñkheñ dikhā rahī hai

shimle kī rail-gāḌī

sunsān ghāTiyoñ par

ūñchī pahāḌiyoñ meñ

pathrīlī choTiyoñ par

Tīloñ meñ jhāḌiyoñ meñ

lahrātī aa rahī hai

shimle kī rail-gāḌī

lohe kī ek nāgin

bal khā rahī ho jaise

aur ūñchī choTiyoñ par

lahrā rahī ho jaise

is tarah aa rahī hai

shimle kī rail-gāḌī

ban-bāsiyoñ ko kyā kyā

dil shaad kar rahī hai

sunsān jañgaloñ ko

ābād kar rahī hai

bastī basā rahī hai

shimle kī rail-gāḌī

niklī surañg se yuuñ

juuñ bil se naag nikle

chamkī sire pe jaise

bhaTTī se aag nikle

kyā gul khilā rahī hai

shimle kī rail-gāḌī

solan ki choTiyon se

jhanDi hila rahi hai

ghusse mein be-tahasha

siTi baja rahi hai

dekho wo aa rahi hai

shimle ki rail-gaDi

do enginon ke munh se

shoale nikal rahe hain

do nag mil ke goya

dozaKH ugal rahe hain

aankhen dikha rahi hai

shimle ki rail-gaDi

sunsan ghaTiyon par

unchi pahaDiyon mein

pathrili choTiyon par

Tilon mein jhaDiyon mein

lahraati aa rahi hai

shimle ki rail-gaDi

lohe ki ek nagin

bal kha rahi ho jaise

aur unchi choTiyon par

lahra rahi ho jaise

is tarah aa rahi hai

shimle ki rail-gaDi

ban-basiyon ko kya kya

dil shad kar rahi hai

sunsan jangalon ko

aabaad kar rahi hai

basti basa rahi hai

shimle ki rail-gaDi

nikli surang se yun

jun bil se nag nikle

chamki sire pe jaise

bhaTTi se aag nikle

kya gul khila rahi hai

shimle ki rail-gaDi