shirkat-e-mahfil

tū hamesha rahtā hai chīñ-bar-jabīñ afsurda dil

phir kisī kī bazm-e-ishrat meñ na jā bahr-e-ḳhudā

ḳhud hī apnī jaan se be-zār tū insāf kar

tujh se ahl-e-bazm phir kis tarah ḳhush hoñge bhalā

chāhiye is tarah jaanā mahfil-e-ahbāb meñ

baaġh meñ jis tarah ḳhush ḳhush aatī hai bād-e-sabā

ḳhair-maqdam kā ishāra jhuum kar kartī hai shāḳh

aur chaTak kar detī haiñ kaliyāñ sadā-e-marhabā

jis shajar ke paas se guzre lagā vo jhūmne

pahuñche jis ġhunche tak afsurda thā vo hañsne lagā

dil pe jo guzre vo guzre kyuuñ kisī ko ho ḳhabar

sab se baḌh kar hai ḳhudā tū haal dil kā jāntā

shādī-o-ġham jab ki donoñ haiñ jahāñ meñ be-sabāt

vaqt apnā kaaT de hañs bol kar bahr-e-ḳhudā

tu hamesha rahta hai chin-bar-jabin afsurda dil

phir kisi ki bazm-e-ishrat mein na ja bahr-e-KHuda

KHud hi apni jaan se be-zar tu insaf kar

tujh se ahl-e-bazm phir kis tarah KHush honge bhala

chahiye is tarah jaana mahfil-e-ahbab mein

bagh mein jis tarah KHush KHush aati hai baad-e-saba

KHair-maqdam ka ishaara jhum kar karti hai shaKH

aur chaTak kar deti hain kaliyan sada-e-marhaba

jis shajar ke pas se guzre laga wo jhumne

pahunche jis ghunche tak afsurda tha wo hansne laga

dil pe jo guzre wo guzre kyun kisi ko ho KHabar

sab se baDh kar hai KHuda tu haal dil ka jaanta

shadi-o-gham jab ki donon hain jahan mein be-sabaat

waqt apna kaT de hans bol kar bahr-e-KHuda