subh bedar hai

surḳh āñkhoñ se dekhe ga.e ḳhvāb kī

sunñe vaalo kaho koī tā'bīr hai

ek ghar meñ banīñ an-ginat sarhadeñ

ek zindāñ meñ gūñjī ka.ī hasrateñ

ek taalā laboñ pe lagā.e hue

haath kaaTe hue sar jhukā.e hue

mantiqoñ ke nishāñ sab miTā.e hue

aur tārīḳh apnī bhulā.e hue

maslahat kā libāda chaḌhā.e hue

ek duuje se nazreñ churā.e hue

aur siine kī jaltī huī aag meñ

ik talātum kā sho'la chhupā.e hue

shor karne lagīñ paañv kī beḌiyāñ

ek qaidī ne liiñ jab zarā karvaTeñ

toḌtī dam ubhartī huī vahshateñ

surḳh āñkhoñ se dekhe ga.e ḳhvāb kī

hai shikasta-dilī phailtī raat hai

aur firqoñ zabānoñ kī bohtāt hai

khoī rang-o-nasl meñ har ik zaat hai

aur insāniyat ko huī maat hai

is ḳharābe meñ sham' jalā.e hue

sarkashī ke haiñ parcham uThā.e hue

hausloñ se saroñ ko uThā.e hue

rūh-e-millat se ḳhud ko jagā.e hue

har 'adāvat ko dil se miTā.e hue

apnī manzil kā rasta banā.e hue

'ahd-e-nau ke haiñ matvāle aa.e hue

lab kī jumbish se toḌī ga.iiñ beḌiyāñ

aur zindāñ meñ kholī ga.iiñ khiḌkiyāñ

surḳh āñkhoñ se dekhe ga.e ḳhvāb kī

phir hasīñ kuchh manāzir sajā.e ga.e

andhī āñkhoñ se dekhe dikhā.e ga.e

gūñgī āvāz meñ phir vo gaaye ga.e

jā ke bahroñ kī bastī sunā.e ga.e

āñkheñ be-nūr thiiñ chehre masrūr the

'aql mā.ūf thī lahje pur-shor the

ḳhvāb-dar-ḳhvāb himmat baḌhāne lage

kuchh umangeñ na.ī phir jagāne lage

khiḌkiyāñ band thiiñ jo bhī khulne lagīñ

boliyāñ aise ḳhvāboñ kī lagne lagīñ

surḳh āñkhoñ se dekhe ga.e ḳhvāb kī

ḳhvāb kankar se āñkhoñ meñ chubhne lage

vo jo afkār the jurm banñe lage

toḌ Daale qalam haath kaaTe ga.e

sach ke nām-o-nishāñ sab miTā.e ga.e

phir se mahlāt apne banā.e ga.e

aur asīroñ se zindāñ sajā.e ga.e

kaaT kar phir zabāneñ bhī pheñkīñ ga.iiñ

aur qadmoñ meñ zanjīreñ Dālīñ ga.iiñ

ḳhvāb rauñde ga.e haq ke ilzām par

haq ko rauñdā gayā ḳhvāb ke naam par

ḳhvāb ke naam jis kī ye tā'bīr thī

surḳh āñkhoñ se dekhe ga.e ḳhvāb kī

rūh-e-millat kā vo jo ‘amal-dār hai

gird qaidī ke ūñchī sī dīvār hai

aaj mansūr phir ik sar-e-dār hai

sub.h bedār hai sub.h bedār hai

surḳh āñkhoñ se dekhe ga.e ḳhvāb kī

surKH aankhon se dekhe gae KHwab ki

sunne walo kaho koi ta'bir hai

ek ghar mein banin an-ginat sarhaden

ek zindan mein gunji kai hasraten

ek tala labon pe lagae hue

hath kaTe hue sar jhukae hue

mantiqon ke nishan sab miTae hue

aur tariKH apni bhulae hue

maslahat ka libaada chaDhae hue

ek duje se nazren churae hue

aur sine ki jalti hui aag mein

ek talatum ka sho'la chhupae hue

shor karne lagin panw ki beDiyan

ek qaidi ne lin jab zara karwaTen

toDti dam ubharti hui wahshaten

surKH aankhon se dekhe gae KHwab ki

hai shikasta-dili phailti raat hai

aur firqon zabanon ki bohtat hai

khoi rang-o-nasl mein har ek zat hai

aur insaniyat ko hui mat hai

is KHarabe mein sham' jalae hue

sarkashi ke hain parcham uThae hue

hauslon se saron ko uThae hue

ruh-e-millat se KHud ko jagae hue

har 'adawat ko dil se miTae hue

apni manzil ka rasta banae hue

'ahd-e-nau ke hain matwale aae hue

lab ki jumbish se toDi gain beDiyan

aur zindan mein kholi gain khiDkiyan

surKH aankhon se dekhe gae KHwab ki

phir hasin kuchh manazir sajae gae

andhi aankhon se dekhe dikhae gae

gungi aawaz mein phir wo gaye gae

ja ke bahron ki basti sunae gae

aankhen be-nur thin chehre masrur the

'aql mauf thi lahje pur-shor the

KHwab-dar-KHwab himmat baDhane lage

kuchh umangen nai phir jagane lage

khiDkiyan band thin jo bhi khulne lagin

boliyan aise KHwabon ki lagne lagin

surKH aankhon se dekhe gae KHwab ki

KHwab kankar se aankhon mein chubhne lage

wo jo afkar the jurm banne lage

toD Dale qalam hath kaTe gae

sach ke nam-o-nishan sab miTae gae

phir se mahlat apne banae gae

aur asiron se zindan sajae gae

kaT kar phir zabanen bhi phenkin gain

aur qadmon mein zanjiren Dalin gain

KHwab raunde gae haq ke ilzam par

haq ko raunda gaya KHwab ke nam par

KHwab ke nam jis ki ye ta'bir thi

surKH aankhon se dekhe gae KHwab ki

ruh-e-millat ka wo jo ‘amal-dar hai

gird qaidi ke unchi si diwar hai

aaj mansur phir ek sar-e-dar hai

subh bedar hai subh bedar hai

surKH aankhon se dekhe gae KHwab ki