subh ka tarana

ḳhabar din ke aane kī maiñ lā rahī huuñ

ujālā zamāne meñ phailā rahī huuñ

bahār apnī mashriq se dikhlā rahī huuñ

pukāre gale saaf chillā rahī huuñ

uTho sone vaalo ki maiñ aa rahī huuñ

azaañ par azaañ murġh dene lagā hai

ḳhushī se har ik jānvar boltā hai

daraḳhtoñ ke uupar ajab chahchahā hai

suhānā hai vaqt aur ThanDī havā hai

uTho sone vaalo ki maiñ aa rahī huuñ

ye chiḌiyāñ jo peḌoñ pe haiñ gul machātīñ

idhar se udhar uḌ ke haiñ aatī jātīñ

dumoñ ko hilātīñ paroñ ko phulātīñ

mirī aamad aamad ke haiñ giit gātīñ

uTho sone vaalo ki maiñ aa rahī huuñ

huī mujh se raunaq pahāḌ aur ban meñ

har ik mulk meñ des meñ aur vatan meñ

khilātī huī phuul aa.ī chaman meñ

bujhātī chalī sham.a ko anjuman meñ

uTho sone vaalo ki maiñ aa rahī huuñ

lo hushyār ho jaao aur āñkheñ kholo

na lo karvaTeñ aur na bistar TaTolo

ḳhudā ko karo yaad aur muñh se bolo

bas ab ḳhair se uTh ke muñh haath dho lo

uTho sone vaalo ki maiñ aa rahī huuñ

KHabar din ke aane ki main la rahi hun

ujala zamane mein phaila rahi hun

bahaar apni mashriq se dikhla rahi hun

pukare gale saf chilla rahi hun

uTho sone walo ki main aa rahi hun

azan par azan murgh dene laga hai

KHushi se har ek jaanwar bolta hai

daraKHton ke upar ajab chahchaha hai

suhana hai waqt aur ThanDi hawa hai

uTho sone walo ki main aa rahi hun

ye chiDiyan jo peDon pe hain gul machatin

idhar se udhar uD ke hain aati jatin

dumon ko hilatin paron ko phulatin

meri aamad aamad ke hain git gatin

uTho sone walo ki main aa rahi hun

hui mujh se raunaq pahaD aur ban mein

har ek mulk mein des mein aur watan mein

khilati hui phul aai chaman mein

bujhati chali shama ko anjuman mein

uTho sone walo ki main aa rahi hun

lo hushyar ho jao aur aankhen kholo

na lo karwaTen aur na bistar TaTolo

KHuda ko karo yaad aur munh se bolo

bas ab KHair se uTh ke munh hath dho lo

uTho sone walo ki main aa rahi hun