subh ki aamad ke sath

qarīb-e-sub.h sadā-e-shikast-e-jāñ ubhrī

laboñ kā zahr achānak pighal gayā āḳhir

sukūt-e-jism lahū piite piite chauñk uThā

ye kaun shab kī tamāzat se jal gayā āḳhir

karāhtā sā uThā koī TūTtā paikar

siyāhiyoñ meñ sulagtā huā dhuāñ jaise

jhaTak ke daur huī bistaraoñ se uktāhaT

lipaT gayā ho koī saañp nā-gahāñ jaise

azāb-e-rūh makānoñ kā dard chāTegā

baḌheñge shahr-e-tamannā kī samt sab saa.e

kashā-kashoñ ke samundar meñ Dubkiyāñ lete

har ek zaat kī maujūdiyat se uktā.e

gharoñ meñ qaid dar-o-bām kī har ik uljhan

galī galī ke laboñ se lipaT rahī hogī

tabī.atoñ ko sambhāle hue dhueñ kī lakīr

varaq kitāb-e-nafas ke ulaT rahī hogī

rahegā yuuñ hī saroñ par itaab kā sūraj

isī tarah se basar hote jā.eñge din-rāt

kaleja muñh meñ rakhe aur siine par patthar

guzār deñge guzarte hue sabhī sadmāt

qarib-e-subh sada-e-shikast-e-jaan ubhri

labon ka zahr achanak pighal gaya aaKHir

sukut-e-jism lahu pite pite chaunk uTha

ye kaun shab ki tamazat se jal gaya aaKHir

karahta sa uTha koi TuTta paikar

siyahiyon mein sulagta hua dhuan jaise

jhaTak ke daur hui bistaraon se uktahaT

lipaT gaya ho koi sanp na-gahan jaise

azab-e-ruh makanon ka dard chaTega

baDhenge shahr-e-tamanna ki samt sab sae

kasha-kashon ke samundar mein Dubkiyan lete

har ek zat ki maujudiyat se uktae

gharon mein qaid dar-o-baam ki har ek uljhan

gali gali ke labon se lipaT rahi hogi

tabiaton ko sambhaale hue dhuen ki lakir

waraq kitab-e-nafas ke ulaT rahi hogi

rahega yun hi saron par itab ka suraj

isi tarah se basar hote jaenge din-raat

kaleja munh mein rakhe aur sine par patthar

guzar denge guzarte hue sabhi sadmat