sukun

ek tavīl umr

tum aur maiñ

apne apne gharoñ meñ band the

jahāñ zindagī ne kaḌe pahre lagā rakkhe the

usūloñ ke rishtoñ ke aur farā.ez ke

is tamām muddat meñ

jo shāyad sattarah baras thī yā sattar

ek dūsre kī saañs kī āvāz ne

hameñ tapish dī

āvāz jo bahut halkī bahut maddham thī

tapish jo duur thartharātī lau se bhī mulā.em

aur ek din

sāñsoñ kī tapish

aur thartharātī lau kī aag meñ

zindagī ke saare pahre mom kī tarah pighal ga.e

vīrān ghar meñ gulāb ke rañg

aur motiyā kī ḳhushbū kā iztirāb bikhar gayā

jis ne hamārī pur-sukūn ḳhāmoshī

ko reza reza kar diyā

aao aaj phir ham

tum aur maiñ

apne pairoñ ke ird-gird

halkī halkī lakīroñ ke dā.ere khīñche leñ

ye lakīreñ shāyad kabhī dīvār ban jaa.eñ

aur ham phir apne apne gharoñ meñ

sukūn kī niiñd so sakīñ

ek tawil umr

tum aur main

apne apne gharon mein band the

jahan zindagi ne kaDe pahre laga rakkhe the

usulon ke rishton ke aur faraez ke

is tamam muddat mein

jo shayad sattarah baras thi ya sattar

ek dusre ki sans ki aawaz ne

hamein tapish di

aawaz jo bahut halki bahut maddham thi

tapish jo dur thartharaati lau se bhi mulaem

aur ek din

sanson ki tapish

aur thartharaati lau ki aag mein

zindagi ke sare pahre mom ki tarah pighal gae

viran ghar mein gulab ke rang

aur motiya ki KHushbu ka iztirab bikhar gaya

jis ne hamari pur-sukun KHamoshi

ko reza reza kar diya

aao aaj phir hum

tum aur main

apne pairon ke ird-gird

halki halki lakiron ke daere khinche len

ye lakiren shayad kabhi diwar ban jaen

aur hum phir apne apne gharon mein

sukun ki nind so sakin