sunahri darwaze ke bahar

larazte badan

rañg kohre meñ lipTe hue

adh-marī raushnī kā kafan oḌh kar

maut kī sar-zamīñ meñ ujāloñ pe qurbān hone se pahle

bahut der tak

apne ehsās kī aañch sahte rahe

shaam

niim tārīk rāhoñ pe māthā ragaḌtī rahī

kāñptī thartharātī shab-e-ġham ke sāñche meñ Dhalne se pahle

bahut der tak

sard fānūs ke paas Thahrī rahī

chāñd

ākāsh ke gahre niile samundar meñ tāroñ kī indar-sabhā se

bahut der tak

maut kī sarzamīñ par ujāloñ kī gul-poshiyāñ kar rahā thā

lahad-tā-lahad koī saaya na ḳhāka

qadam-tā-qadam manziloñ ke nishāñ gum

makīnoñ se ḳhālī makānoñ ke dar

taḳhtiyāñ rahne vāloñ ke nāmoñ kī le kar

bahut der tak muntazir the magar

koī dastak na aahaT

idhar

be-zabāñ shahr kī tīrgī meñ

larazte badan

kaif-o-kam ke badalte hue zāviyoñ meñ

ulajhte chhalakte bikharte simaTte rahe

aur kohre meñ lipTe hue

shāḳh-dar-shāḳh raushnī se guzar kar

salīboñ ke saa.e meñ dam le rahe haiñ

larazte badan

rang kohre mein lipTe hue

adh-mari raushni ka kafan oDh kar

maut ki sar-zamin mein ujalon pe qurban hone se pahle

bahut der tak

apne ehsas ki aanch sahte rahe

sham

nim tarik rahon pe matha ragaDti rahi

kanpti thartharaati shab-e-gham ke sanche mein Dhalne se pahle

bahut der tak

sard fanus ke pas Thahri rahi

chand

aakash ke gahre nile samundar mein taron ki indar-sabha se

bahut der tak

maut ki sarzamin par ujalon ki gul-poshiyan kar raha tha

lahad-ta-lahad koi saya na KHaka

qadam-ta-qadam manzilon ke nishan gum

makinon se KHali makanon ke dar

taKHtiyan rahne walon ke namon ki le kar

bahut der tak muntazir the magar

koi dastak na aahaT

idhar

be-zaban shahr ki tirgi mein

larazte badan

kaif-o-kam ke badalte hue zawiyon mein

ulajhte chhalakte bikharte simaTte rahe

aur kohre mein lipTe hue

shaKH-dar-shaKH raushni se guzar kar

salibon ke sae mein dam le rahe hain