suqraat ki maut

maut kā farmān sun kar

yuuñ lagā suqrāt kahne

ai mire farmāñ-ravāo

ai vatan ke rahnumāo

maut se mujh ko Darā kar

tum ye kyā farmā rahe ho

rāstī ko chhoḌ duuñ maiñ

gyaan kā dīpak bujhā duuñ

sāñch kā saudā na bechūñ

maiñ sadāqat kā payambar

mahram-e-rāz-e-haqīqat

maz.har-e-nūr-e-ḳhudā huuñ

rāstī kā pāsbāñ huuñ

aadmī ke dil se mujh ko

duur karnā hai añdherā

zindagī jab tak rahegī

maiñ yahī kartā rahūñgā

maut se Dartā nahīñ maiñ

maut merī zindagī hai

maut merī aabrū hai

khīñch lo merī zabāñ tum

yā mirī gardan uḌā do

mujh ko suulī par chaḌhā do

ḳhvāh zinda hī jalā do

ye magar mujh se na hogā

rāstī ko chhoḌ duuñ maiñ

gyaan kā dīpak bujhā duuñ

sāñch kā saudā na bechūñ

laao ye jām-e-halāhil

mere hoñToñ se lagā do

chhīn lo guftār merī

ḳhatm kar do zindagī ko

haañ magar itnā batā duuñ

maiñ kabhī martā nahīñ huuñ

maiñ huuñ aisā tund sho.ala

maut ke tūfān se bhī

jo kabhī bujhtā nahīñ hai

merī hastī jāvedāñ hai

jāvedāñ merā takallum

mere lab tum sī sakoge

sūr-e-isrāfīl huuñ maiñ

ḳhaak ho jā.ūñgā phir bhī

guftugū kartā rahūñgā

dars-e-haq detā rahūñgā

māh-o-anjum kī ziyā se

nik.hat-e-bād-e-sabā se

lāla-o-gul kī mahak se

sub.h-e-ḳhandāñ kī damak se

ye sadā aatī rahegī

sach kabhī Dartā nahīñ hai

sach kabhī martā nahīñ hai

maut ka farman sun kar

yun laga suqraat kahne

ai mere farman-rawao

ai watan ke rahnumao

maut se mujh ko Dara kar

tum ye kya farma rahe ho

rasti ko chhoD dun main

gyan ka dipak bujha dun

sanch ka sauda na bechun

main sadaqat ka payambar

mahram-e-raaz-e-haqiqat

mazhar-e-nur-e-KHuda hun

rasti ka pasban hun

aadmi ke dil se mujh ko

dur karna hai andhera

zindagi jab tak rahegi

main yahi karta rahunga

maut se Darta nahin main

maut meri zindagi hai

maut meri aabru hai

khinch lo meri zaban tum

ya meri gardan uDa do

mujh ko suli par chaDha do

KHwah zinda hi jala do

ye magar mujh se na hoga

rasti ko chhoD dun main

gyan ka dipak bujha dun

sanch ka sauda na bechun

lao ye jam-e-halahil

mere honTon se laga do

chhin lo guftar meri

KHatm kar do zindagi ko

han magar itna bata dun

main kabhi marta nahin hun

main hun aisa tund shoala

maut ke tufan se bhi

jo kabhi bujhta nahin hai

meri hasti jawedan hai

jawedan mera takallum

mere lab tum si sakoge

sur-e-israfil hun main

KHak ho jaunga phir bhi

guftugu karta rahunga

dars-e-haq deta rahunga

mah-o-anjum ki ziya se

nikhat-e-baad-e-saba se

lala-o-gul ki mahak se

subh-e-KHandan ki damak se

ye sada aati rahegi

sach kabhi Darta nahin hai

sach kabhi marta nahin hai