suraj ki kirnon ka git

sunahrī sūraj ne āsmāñ par

kahā ki kyā bhejūñ maiñ zamīñ ko

ye raag thā kirnoñ kī zabāñ par

zamīñ pe jaane do tum hamīñ ko

taras gayā dhuup ko zamāna

haiñ kab se chhā.ī huī ghaTā.eñ

jo aaj kar do hameñ ravāna

zamīn par nuur jā bichhā.eñ

ghaTā ke pardoñ ko chaak kar deñ

zamīn par raushnī luTā.eñ

chaman ko kīchaḌ se paak kar deñ

daraḳhtoñ se kheleñ aur khilā.eñ

ye giit gaatī huī jahāñ meñ

chhamā-chham aa.eñ sunahrī kirneñ

har ek ghar meñ har ik makāñ meñ

machal ke chhā.eñ sunahrī kirneñ

jo bachche is vaqt so rahe haiñ

ye un ke bistar pe jhūmtī haiñ

vo chup haiñ behosh ho rahe haiñ

ye un kī āñkhoñ ko chūmtī haiñ

ye un ke gāloñ pe girtī haiñ

to gaal ho jaate haiñ sunahrī

ye un ke bāloñ pe girtī haiñ jab

to baal ho jaate haiñ sunahrī

rasīlī lai meñ sunā rahī haiñ

ki uTho jaag uTho pyāre bachcho

havā.eñ bhī giit gā rahī haiñ

ki aao ab khelo pyāre bachcho

bas uTh khaḌe ho hamārī ḳhātir

ye socho aa.e haiñ ham kahāñ se

aur is pe dekho tumhārī ḳhātir

ye tohfa laa.e haiñ āsmāñ se

ye tohfa tum jānte ho kyā hai

sunahrī sūraj kī raushnī hai

vo dekho sūraj chamak rahā hai

shafaq kī vaadī lahak rahī hai

sunahri suraj ne aasman par

kaha ki kya bhejun main zamin ko

ye rag tha kirnon ki zaban par

zamin pe jaane do tum hamin ko

taras gaya dhup ko zamana

hain kab se chhai hui ghaTaen

jo aaj kar do hamein rawana

zamin par nur ja bichhaen

ghaTa ke pardon ko chaak kar den

zamin par raushni luTaen

chaman ko kichaD se pak kar den

daraKHton se khelen aur khilaen

ye git gati hui jahan mein

chhama-chham aaen sunahri kirnen

har ek ghar mein har ek makan mein

machal ke chhaen sunahri kirnen

jo bachche is waqt so rahe hain

ye un ke bistar pe jhumti hain

wo chup hain behosh ho rahe hain

ye un ki aankhon ko chumti hain

ye un ke galon pe girti hain

to gal ho jate hain sunahri

ye un ke baalon pe girti hain jab

to baal ho jate hain sunahri

rasili lai mein suna rahi hain

ki uTho jag uTho pyare bachcho

hawaen bhi git ga rahi hain

ki aao ab khelo pyare bachcho

bas uTh khaDe ho hamari KHatir

ye socho aae hain hum kahan se

aur is pe dekho tumhaari KHatir

ye tohfa lae hain aasman se

ye tohfa tum jaante ho kya hai

sunahri suraj ki raushni hai

wo dekho suraj chamak raha hai

shafaq ki wadi lahak rahi hai