swadeshi tahrik

vatan ke dard-e-nihāñ kī davā sudeshī hai

ġharīb qaum kī hājat-ravā sudeshī hai

tamām dahr kī rūh-e-ravāñ hai ye tahrīk

sharīk husn-e-amal jā-ba-jā sudeshī hai

qarār-e-ḳhātir-e-āshufta hai fazā us kī

nishān-e-manzil-e-sidq-o-safā sudeshī hai

vatan se jin ko mohabbat nahīñ vo kyā jāneñ

ki chiiz kaun bideshī hai kyā sudeshī hai

usī ke saaya meñ paatā hai parvarish iqbāl

misāl-e-sāya-e-bāl-e-humā sudeshī hai

usī ne ḳhaak ko sonā banā diyā aksar

jahāñ meñ gar hai koī kīmiyā sudeshī hai

fanā ke haath meñ hai jān-e-nā-tavān-e-vatan

baqā jo chāho to rāz-e-baqā sudeshī hai

ho apne mulk kī chīzoñ se kyuuñ hameñ nafrat

har ik qaum kā jab mudda.ā sudeshī hai

watan ke dard-e-nihan ki dawa sudeshi hai

gharib qaum ki hajat-rawa sudeshi hai

tamam dahr ki ruh-e-rawan hai ye tahrik

sharik husn-e-amal ja-ba-ja sudeshi hai

qarar-e-KHatir-e-ashufta hai faza us ki

nishan-e-manzil-e-sidq-o-safa sudeshi hai

watan se jin ko mohabbat nahin wo kya jaanen

ki chiz kaun bideshi hai kya sudeshi hai

usi ke saya mein pata hai parwarish iqbaal

misal-e-saya-e-baal-e-huma sudeshi hai

usi ne KHak ko sona bana diya aksar

jahan mein gar hai koi kimiya sudeshi hai

fana ke hath mein hai jaan-e-na-tawan-e-watan

baqa jo chaho to raaz-e-baqa sudeshi hai

ho apne mulk ki chizon se kyun hamein nafrat

har ek qaum ka jab muddaa sudeshi hai