taaruf

ḳhuub pahchān lo asrār huuñ maiñ

jins-e-ulfat kā talabgār huuñ maiñ

ishq hī ishq hai duniyā merī

fitna-e-aql se be-zār huuñ maiñ

ḳhvāb-e-ishrat meñ haiñ arbāb-e-ḳhirad

aur ik shā.ir-e-bedār huuñ maiñ

chheḌtī hai jise mizrāb-e-alam

sāz-e-fitrat kā vahī taar huuñ maiñ

rañg nazzāra-e-qudrat mujh se

jān-e-rañgīni-e-kohsār huuñ maiñ

nashsha-e-nargis-e-ḳhūbāñ mujh se

ġhāza-e-āriz-o-ruḳhsār huuñ maiñ

aib jo hāfiz o ḳhayyām maiñ thā

haañ kuchh is kā bhī gunahgār huuñ maiñ

zindagī kyā hai gunāh-e-ādam

zindagī hai to gunahgār huuñ maiñ

rashk-e-sad-hosh hai mastī merī

aisī mastī hai ki hushyār huuñ maiñ

le ke niklā huuñ guhar-hā-e-suḳhan

maah o anjum kā ḳharīdār huuñ maiñ

dair o ka.aba meñ mire hī charche

aur rusvā sar-e-bāzār huuñ maiñ

kufr o ilhād se nafrat hai mujhe

aur maz.hab se bhī be-zār huuñ maiñ

ahl-e-duniyā ke liye nañg sahī

raunaq-e-anjuman-e-yār huuñ maiñ

ain is be-sar-o-sāmānī meñ

kyā ye kam hai ki guhar-bār huuñ maiñ

merī bātoñ meñ masīhā.ī hai

log kahte haiñ ki bīmār huuñ maiñ

mujh se barham hai mizāj-e-pīrī

mujrim-e-shoḳhi-e-guftār huuñ maiñ

huur o ġhilmāñ kā yahāñ zikr nahīñ

nau-e-insāñ kā parastār huuñ maiñ

mahfil-e-dahr pe taarī hai jumūd

aur vārafta-e-raftār huuñ maiñ

ik lapaktā huā sho.ala huuñ maiñ

ek chaltī huī talvār huuñ maiñ

KHub pahchan lo asrar hun main

jins-e-ulfat ka talabgar hun main

ishq hi ishq hai duniya meri

fitna-e-aql se be-zar hun main

KHwab-e-ishrat mein hain arbab-e-KHirad

aur ek shair-e-bedar hun main

chheDti hai jise mizrab-e-alam

saz-e-fitrat ka wahi tar hun main

rang nazzara-e-qudrat mujh se

jaan-e-rangini-e-kohsar hun main

nashsha-e-nargis-e-KHuban mujh se

ghaza-e-ariz-o-ruKHsar hun main

aib jo hafiz o KHayyam main tha

han kuchh is ka bhi gunahgar hun main

zindagi kya hai gunah-e-adam

zindagi hai to gunahgar hun main

rashk-e-sad-hosh hai masti meri

aisi masti hai ki hushyar hun main

le ke nikla hun guhar-ha-e-suKHan

mah o anjum ka KHaridar hun main

dair o kaba mein mere hi charche

aur ruswa sar-e-bazar hun main

kufr o ilhad se nafrat hai mujhe

aur mazhab se bhi be-zar hun main

ahl-e-duniya ke liye nang sahi

raunaq-e-anjuman-e-yar hun main

ain is be-sar-o-samani mein

kya ye kam hai ki guhar-bar hun main

meri baaton mein masihai hai

log kahte hain ki bimar hun main

mujh se barham hai mizaj-e-piri

mujrim-e-shoKHi-e-guftar hun main

hur o ghilman ka yahan zikr nahin

nau-e-insan ka parastar hun main

mahfil-e-dahr pe tari hai jumud

aur warafta-e-raftar hun main

ek lapakta hua shoala hun main

ek chalti hui talwar hun main