taba kai

lafz aur hoñT ke mābain kahīñ

saañs ulajh jaatī hai

tere āñgan ke kisī gosha-e-nādīda meñ

manhanī hāthoñ se dīvār pakaḌtī huī

ummīd kī bel

apne hī ġham se dahaktī rahī dam dam paiham

apne hī nam se mahaktī rahī mausam mausam

lafz ubharte rahe ruk ruk ke sar-e-shāḳh-e-niyāz

bel ke phuul kabhī rañg kabhī ḳhushbū se

aan kī aan tire lams meñ jiinā chāheñ

majas-e-zāt kī tanhā.ī meñ

aur zamistān-e-ḳhamoshī kī girāñbārī meñ

yahī armān rahā

tū unheñ chāhe na chāhe lekin

kabhī pal bhar ko pazīrā.ī kā iz.hār kare

lamha bhar lazzat-e-shunvā.ī se sarshār kare

aaj is dard kī barsāt ke din

bel se ek mahak uTThī hai tūfāñ kī tarah

phuul vā hoñToñ ke mānind haiñ har barg hai ik dīda-e-giryāñ kī tarah

aur havā kaañp rahī hai kisī hamrāz pareshāñ kī tarah

kyā ye betāb dhaḌakte hue lafz

aaj bhī terī mizha par na munavvar hoñge

lafz aur honT ke mabain kahin

sans ulajh jati hai

tere aangan ke kisi gosha-e-nadida mein

manhani hathon se diwar pakaDti hui

ummid ki bel

apne hi gham se dahakti rahi dam dam paiham

apne hi nam se mahakti rahi mausam mausam

lafz ubharte rahe ruk ruk ke sar-e-shaKH-e-niyaz

bel ke phul kabhi rang kabhi KHushbu se

aan ki aan tere lams mein jina chahen

majas-e-zat ki tanhai mein

aur zamistan-e-KHamoshi ki giranbari mein

yahi arman raha

tu unhen chahe na chahe lekin

kabhi pal bhar ko pazirai ka izhaar kare

lamha bhar lazzat-e-shunwai se sarshaar kare

aaj is dard ki barsat ke din

bel se ek mahak uTThi hai tufan ki tarah

phul wa honTon ke manind hain har barg hai ek dida-e-giryan ki tarah

aur hawa kanp rahi hai kisi hamraaz pareshan ki tarah

kya ye betab dhaDakte hue lafz

aaj bhi teri mizha par na munawwar honge