talash

ye bujhī sī shaam ye sahmī huī parchhā.iyāñ

ḳhūn-e-dil bhī is fazā meñ rañg bhar saktā nahīñ

aa utar aa kāñpte hoñToñ pe ai māyūs aah

saqf-e-zindāñ par koī parvāz kar saktā nahīñ

jhilmilā.e merī palkoñ pe mah-o-ḳhur bhī to kyaa?

is añdhere ghar meñ ik taarā utar saktā nahīñ

luuT lī zulmat ne rū-e-hind kī tābindagī

raat ke kāñdhe pe sar rakh kar sitāre so ga.e

vo bhayānak āñdhiyāñ, vo abtarī, vo ḳhalfashār

kārvāñ be-rāh ho niklā, musāfir kho ga.e

haiñ isī aivān-e-be-dar meñ yaqīnan rahnumā

aa ke kyuuñ dīvār tak naqsh-e-qadam gum ho ga.e

dekh ai josh-e-amal vo saqf ye dīvār hai

ek rauzan khol denā bhī koī dushvār hai

ye bujhi si sham ye sahmi hui parchhaiyan

KHun-e-dil bhi is faza mein rang bhar sakta nahin

aa utar aa kanpte honTon pe ai mayus aah

saqf-e-zindan par koi parwaz kar sakta nahin

jhilmilae meri palkon pe mah-o-KHur bhi to kya?

is andhere ghar mein ek tara utar sakta nahin

luT li zulmat ne ru-e-hind ki tabindagi

raat ke kandhe pe sar rakh kar sitare so gae

wo bhayanak aandhiyan, wo abtari, wo KHalfashaar

karwan be-rah ho nikla, musafir kho gae

hain isi aiwan-e-be-dar mein yaqinan rahnuma

aa ke kyun diwar tak naqsh-e-qadam gum ho gae

dekh ai josh-e-amal wo saqf ye diwar hai

ek rauzan khol dena bhi koi dushwar hai