tanhai ki ek nazm

bahut chhoTī sī ik taqrīb rakhī hai

ye duniyā hai

lihāzā hasb-e-ḳhvāhish kuchh yahāñ ho kar nahīñ detā

so ye taqrīb jaane ho na ho

par tum zarūr aanā

tum aanā

aarzū kī baat hogī

zindagī par tabsire hoñge

vahāñ ruknā

jahāñ phūloñ kī sañgat meñ ravish par dil dhare hoñge

qabā-e-chāk pahne kuchh kushāda-zarf istiqbāl ko bāhar khaḌe hoñge

tumheñ jo rañg bhī bhaa.e pahan aanā

tumheñ jo bhes ḳhush aa.e

dabe paañv

havā ke dosh par

yā chāñd kī kirnoñ pe chal kar

pā-piyāda harf hāthoñ meñ uThā.e yā tahī-dāmāñ

kisī sūrat bhī aanā

bas chale aanā

bahut chhoTī sī ik taqrīb rakhī hai

na ab shab-zādgī se koī shikva

na zamāne ke taġhāful se shikāyat hai

zarūr aanā mire ġham kī nihāyat hai

bahut chhoTi si ek taqrib rakhi hai

ye duniya hai

lihaza hasb-e-KHwahish kuchh yahan ho kar nahin deta

so ye taqrib jaane ho na ho

par tum zarur aana

tum aana

aarzu ki baat hogi

zindagi par tabsire honge

wahan rukna

jahan phulon ki sangat mein rawish par dil dhare honge

qaba-e-chaak pahne kuchh kushada-zarf istiqbaal ko bahar khaDe honge

tumhein jo rang bhi bhae pahan aana

tumhein jo bhes KHush aae

dabe panw

hawa ke dosh par

ya chand ki kirnon pe chal kar

pa-piyaada harf hathon mein uThae ya tahi-daman

kisi surat bhi aana

bas chale aana

bahut chhoTi si ek taqrib rakhi hai

na ab shab-zadgi se koi shikwa

na zamane ke taghaful se shikayat hai

zarur aana mere gham ki nihayat hai