tarana-e-reKHta

sar chaḌh ke boltā hai urdu zabāñ kā jaadū

hindostāñ kī miTTī ke āsmāñ kā jaadū

hindostāñ kā jaadū saare jahāñ kā jaadū

sar chaḌh ke boltā hai urdu zabāñ kā jaadū

jap-jāp jogiyoñ kā na.ara qalandaroñ kā

tahzīb mahfiloñ kī aur shor mai-kadoñ kā

kūche meñ dilbaroñ ke hañgāma āshiqoñ kā

ma.ashūq kī nigah ke tīr-o-kamāñ kā jaadū

dariyā haiñ 'mīr'-o-'ġhālib' har lab pe jo ravāñ haiñ

'faiz' o 'firāq' aur 'dāġh' har dil pe hukmarāñ haiñ

aur 'kirshn-chandr' 'manto' zinda kahāniyāñ haiñ

lafzoñ ke aa.ine meñ husn-e-bayāñ kā jaadū

duniyā dil-e-ghazal meñ mai-ḳhāna ishq kā hai

har ruuh vajd meñ hai har jism meñ nasha hai

ma.ashūq bandagī hai ma.ashūq hī ḳhudā hai

mandir kī ghanTiyoñ meñ bole azaañ kā jaadū

TuuTe hue diloñ ko joḌe rafūgarī se

joḌe tamām girheñ jazboñ kī sādgī se

rah jaa.eñ dost ban kar aa.eñ jo ajnabī se

daa.em mohabbatoñ ke āb-e-ravāñ kā jaadū

hindostāñ kā jaadū saare jahāñ kā jaadū

hindostāñ kā jaadū urdu zabāñ kā jaadū

hindostāñ kā jaadū saare jahāñ kā jaadū

sar chaḌh ke boltā hai.....

sar chaDh ke bolta hai urdu zaban ka jadu

hindostan ki miTTi ke aasman ka jadu

hindostan ka jadu sare jahan ka jadu

sar chaDh ke bolta hai urdu zaban ka jadu

jap-jap jogiyon ka nara qalandaron ka

tahzib mahfilon ki aur shor mai-kadon ka

kuche mein dilbaron ke hangama aashiqon ka

mashuq ki nigah ke tir-o-kaman ka jadu

dariya hain 'mir'-o-'ghaalib' har lab pe jo rawan hain

'faiz' o 'firaq' aur 'dagh' har dil pe hukmaran hain

aur 'kirshn-chandr' 'manto' zinda kahaniyan hain

lafzon ke aaine mein husn-e-bayan ka jadu

duniya dil-e-ghazal mein mai-KHana ishq ka hai

har ruh wajd mein hai har jism mein nasha hai

mashuq bandagi hai mashuq hi KHuda hai

mandir ki ghanTiyon mein bole azan ka jadu

TuTe hue dilon ko joDe rafugari se

joDe tamam girhen jazbon ki sadgi se

rah jaen dost ban kar aaen jo ajnabi se

daem mohabbaton ke aab-e-rawan ka jadu

hindostan ka jadu sare jahan ka jadu

hindostan ka jadu urdu zaban ka jadu

hindostan ka jadu sare jahan ka jadu

sar chaDh ke bolta hai