tawaif

apnī fitrat kī bulandī pe mujhe naaz hai kab

haañ tirī past-nigāhī se gila hai mujh ko

tū girā degī mujhe apnī nazar se varna

tere qadmoñ pe to sajda bhī ravā hai mujh ko

tū ne har aan badaltī huī is duniyā meñ

merī pā.indagi-e-ġham ko to dekhā hotā

kaliyāñ be-zār haiñ shabnam ke talavvun se magar

tū ne is dīda-e-pur-nam ko to dekhā hotā

haa.e jaltī huī hasrat ye tirī āñkhoñ meñ

kahīñ mil jaa.e mohabbat kā sahārā tujh ko

apnī pastī kā bhī ehsās phir itnā ehsās

ki nahīñ merī mohabbat bhī gavārā tujh ko

aur ye zard se ruḳhsār ye ashkoñ kī qatār

mujh se be-zār mirī arz-e-vafā se be-zār

apni fitrat ki bulandi pe mujhe naz hai kab

han teri past-nigahi se gila hai mujh ko

tu gira degi mujhe apni nazar se warna

tere qadmon pe to sajda bhi rawa hai mujh ko

tu ne har aan badalti hui is duniya mein

meri paindagi-e-gham ko to dekha hota

kaliyan be-zar hain shabnam ke talawwun se magar

tu ne is dida-e-pur-nam ko to dekha hota

hae jalti hui hasrat ye teri aankhon mein

kahin mil jae mohabbat ka sahaara tujh ko

apni pasti ka bhi ehsas phir itna ehsas

ki nahin meri mohabbat bhi gawara tujh ko

aur ye zard se ruKHsar ye ashkon ki qatar

mujh se be-zar meri arz-e-wafa se be-zar