tin sharabi

zikr nahīñ ye farzānoñ kā

qissa hai ik dīvānoñ kā

masco, paris aur london meñ

dekhe maiñ ne tiin sharābī

surḳh thiiñ āñkheñ ruuh gulābī

nashsha-e-mai kā taaj jabīñ par

fikr falak par paañv zamīñ par

be-ḳhabar apnī laġhzish-e-pā se

bā-ḳhabar apne ahd-e-vafā se

duḳhtar-e-raz ke dar ke bhikārī

apne qalb o nazar ke shikārī

pī lene ke ba.ad bhī pyāse

jaam kī sūrat chhalke chhalke

abr kī sūrat halke halke

mastī kī talvār uThā.e

fasl-e-gul chehroñ pe khilā.e

qadam qadam par bahak rahe the

mahak rahe the chahak rahe the

ek ne shāyad whiskey pī thī

dūsre ne shampain kī botal

tīsare ne vo pighlī chāñdī

vodka kī sayyāl hasīna

vo shai jis kī tābish-e-ruḳh se

shīshe ko aa jaa.e pasīna

maiñ ne un nāzuk lamhoñ meñ

rūh-e-bashar ko uryāñ dekhā

ahd-e-ḳhizāñ kā rañg-e-parīdañ

rañg-e-ahd-e-bahārāñ dekhā

zāhir dekhā pinhāñ dekhā

zikr nahīñ ye farzānoñ kā

qissa hai ik dīvānoñ kā

raat ne apnī kaalī zabāñ se

ḳhuun shafaq ke dil kā chāTā

chaar taraf ḳhāmoshī chhā.ī

phail gayā har-sū sannāTā

jannat-e-paris ke pahlū meñ

seine kī maujoñ ko niiñd aa.ī

Dasne lagī mujh ko tanhā.ī

mai-ḳhāne meñ jā kar maiñ ne

aag se dil kī pyaas bujhā.ī

riñd bahut the lekin vo sab

apne nashe meñ kho.e hue the

jaag rahī thiiñ āñkheñ lekin

dil to sab ke so.e hue the

koī nahīñ thā un meñ merā

meñ ye baiThā soch rahā thā

kab ye zālim raat kaTegī

kab vāpas aa.egā saverā

itne meñ ik qāmat-e-ra.anā

qadam qadam par phuul khilātā

hoñToñ se ma.asūm tabassum

āñkhoñ se bijlī barsātā

mai-ḳhāne meñ jhuum ke aayā

naaz o adā ke daam bichhātā

aish o tarab kī mahbūbāyeñ

nashsha-e-mai kī doshīzā.eñ

rah ga.iiñ apnī āñkheñ mal kar

aa.ī qayāmat chaal meñ Dhal kar

sikkoñ kī jhankār pe gaatī

sone kī talvār nachātī

apne lahū meñ aap nahātī

is nāzuk lamhe meñ maiñ ne

hirs-o-havas ko raqsāñ dekhā

zad meñ nizām-e-zardārī kī

rūh-e-bashar ko larzāñ dekhā

majbūrī ko uryāñ dekhā

zikr nahīñ ye farzānoñ kā

qissa hai ik dīvānoñ kā

gahre kohre kī lahroñ meñ

saarā london Duub gayā thā

lamhoñ kī raushan āñkhoñ meñ

shaam kā kājal phail chukā thā

raat kī niilī devī jaagī

din ke devtā ko niiñd aa.ī

Dasne lagī mujh ko tanhā.ī

mai-ḳhāne meñ jā kar maiñ ne

aag se dil kī pyaas bujhā.ī

us mahfil meñ sab hī kuchh thā

saaqī bhī aur pīr-e-muġhāñ bhī

sahbā kī āġhosh ke paale

tiflak-e-mastī rind-e-javāñ bhī

ġhāza o rañg kī ma.ashūqā.eñ

jin kī latāfat shab bhar kī thī

itr aur resham kī mīnā.eñ

jin kī sahbā lab bhar kī thī

aaj kā sukh thaa, kal kā dukh thā

aaj kī āshā, kal kī nirāshā

hañs hañs kar ġham dekh rahe the

in jhūTī ḳhushiyoñ kā tamāshā

nā-ummīdī ke kāñdhoñ par

rakkhā thā ummīd kā lāsha

aaj vo le leñ, jo mil jaa.e

kal kyā hogā kaun batā.e

aaj diloñ kī sham.a jalā.eñ

kal shāyad ye raat na aa.e

aaj to mai kī kashtī khe leñ

kal ye safīna Duub na jaa.e

aaj laboñ kā bosa le leñ

maut kā bosa kal lenā hai

aaj diloñ kā qarz chukā leñ

kal to sab kuchh de denā hai

is nāzuk lamhe meñ maiñ ne

rūh-e-bashar ko vīrāñ dekhā

atom-bomb ke ḳhauf ke aage

aql o ḳhirad ko hairāñ dekhā

saare jahāñ ko larzāñ dekhā

zikr nahīñ ye farzānoñ kā

qissa hai ik dīvānoñ kā

dosh-e-havā par tārīkī ne

zulfoñ ke ḳham khol diye the

masco kī ḳhāmosh fazā meñ

raat kī āñkhoñ ke kājal ne

kitne jaadū ghol diye the

surḳh o siyah maḳhmal ke uupar

shaam ke sāyoñ ko niiñd aa.ī

Dasne lagī mujh ko tanhā.ī

mai-ḳhāne meñ jā kar maiñ ne

aag se dil kī pyaas bujhā.ī

ḳhush-fikroñ kā abr-e-bahārāñ

jhuum paḌā thā mai-ḳhānoñ par

bāda-kashoñ kā rañgīñ jhurmuT

TuuT paḌā thā paimānoñ par

saaz kī lai meñ tezī aa.ī

nashsha-e-mai kī añgḌā.ī ne

apnā hasīñ parcham lahrāyā

chappa chappa zarra zarra

qatra qatra raqs meñ aayā

naġhmoñ ke be-tāb bhañvar ko

lab ke TukḌe chuum rahe the

raqs ke bekal girdāboñ meñ

jism ke tūfāñ ghuum rahe the

chehroñ kī raushan qindīleñ

bāñhoñ kī dil-kash mehrābeñ

raag nazar kī ḳhāmoshī ke

jumbish-e-mizhgāñ kī mizrābeñ

is gardish meñ darham-barham

saarā nizām-e-shams-o-qamar thā

pighal ga.e the chāñd aur sūraj

mahfil-e-gul meñ raqs-e-sharar thā

raat kī peshānī se jaise

tāroñ kā jhūmar TuuT gayā ho

pīr-e-falak ke haath se jaise

tasht-e-zamarrud chhūT gayā ho

hīre, nīlam, la.al aur motī

ḳhaak pe jaise bikhar rahe haiñ

jaise kisī ke barham gesū

bikhar bikhar kar sañvar rahe hoñ

nashsha-e-mai ke sar par lekin

aql o ḳhirad kā taaj dharā thā

duur se baiThā baiThā mujh ko

ek sharābī dekh rahā thā

us ne havā meñ haath se apne

nanhā sā ik bosa pheñkā

ik titlī sī uḌtī aa.ī

mere dil ke phuul ke uupar

kuchh kāñpī aur kuchh mañDlā.ī

baiTh ga.ī par joḌ ke donoñ

pyaar ke ras ko chuus ke uTThī

aur mirī jānib se havā meñ

bosa ban kar phir lahrā.ī

kuchh sharmā.ī, kuchh itrā.ī

aur sharābī mez se uTh kar

raqs ke halqoñ se Takrātā

kashtī kī sūrat chakrātā

haath meñ apnā jaam uThā.e

merī jānib jhūmtā aayā

ḳhandāñ ḳhandāñ, nāzāñ nāzāñ

raqsāñ raqsāñ, pechāñ pechāñ

mauj-e-havā ko chūmtā aayā

merī zabāñ thī urdu, hindī

us kī zabāñ thī ruusī lekin

ek zabāñ thī aisī bhī jo

donoñ zabānoñ se pyārī thī

donoñ jis ko bol rahe the

chand ishāre chand tabassum

nazroñ kā ḳhāmosh takallum

harf yahī the, lafz yahī the

shahad jo dil meñ ghol rahe the

hind kī mastī, ruus kā naqsha

donoñ ne ik jaam banāyā

aur havā meñ us ko nachāyā

saath hamāre sab rindoñ ne

apne diloñ ko haath meñ le kar

mere vatan kā jaam uThāyā

ab jo maiñ ne muḌ kar dekhā

jashn na thā ye dīvānoñ kā

gird hamāre amn kī devī

giit kī hūreñ saaz kī pariyāñ

naġhme aur āvāz kī laḌiyāñ

paris kī bad-baḳht hasīna

maġhrūr america kā sipāhī

london kā badmast sharābī

aish o tarab kī mahbūbā.eñ

nashsha-e-mai kī doshīzā.eñ

ġhāza o rañg kī mashūqā.eñ

itr aur resham kī mīnā.eñ

'hāfiz' aur 'ġhālib' kī ġhazleñ

'pushkin' aur 'tagore' kī nazmeñ

kitne naaz aur kitnī adā.eñ

kitnī shīrīñ aur lailā.eñ

kitne rāñjhe, kitnī hīreñ

kitne but, kitnī tasvīreñ

amn kī koshish aur tadbīreñ

mashriq o maġhrib kī taqdīreñ

halqa bāñdhe naach rahī thiiñ

maiñ ne is nāzuk lamhe meñ

rūh-e-bashar ko nāzāñ dekhā

nashsha o raqs ke pech o ḳham meñ

pyaar kā jazba raqsāñ dekhā

saare jahāñ ko ḳhandāñ dekhā

zikr nahīñ ye farzānoñ kā

qissa hai ik dīvānoñ kā

zikr nahin ye farzanon ka

qissa hai ek diwanon ka

masco, paris aur london mein

dekhe main ne tin sharabi

surKH thin aankhen ruh gulabi

nashsha-e-mai ka taj jabin par

fikr falak par panw zamin par

be-KHabar apni laghzish-e-pa se

ba-KHabar apne ahd-e-wafa se

duKHtar-e-raz ke dar ke bhikari

apne qalb o nazar ke shikari

pi lene ke baad bhi pyase

jam ki surat chhalke chhalke

abr ki surat halke halke

masti ki talwar uThae

fasl-e-gul chehron pe khilae

qadam qadam par bahak rahe the

mahak rahe the chahak rahe the

ek ne shayad whiskey pi thi

dusre ne shampain ki botal

tisare ne wo pighli chandi

wodka ki sayyal hasina

wo shai jis ki tabish-e-ruKH se

shishe ko aa jae pasina

main ne un nazuk lamhon mein

ruh-e-bashar ko uryan dekha

ahd-e-KHizan ka rang-e-paridan

rang-e-ahd-e-bahaaran dekha

zahir dekha pinhan dekha

zikr nahin ye farzanon ka

qissa hai ek diwanon ka

raat ne apni kali zaban se

KHun shafaq ke dil ka chaTa

chaar taraf KHamoshi chhai

phail gaya har-su sannaTa

jannat-e-paris ke pahlu mein

seine ki maujon ko nind aai

Dasne lagi mujh ko tanhai

mai-KHane mein ja kar main ne

aag se dil ki pyas bujhai

rind bahut the lekin wo sab

apne nashe mein khoe hue the

jag rahi thin aankhen lekin

dil to sab ke soe hue the

koi nahin tha un mein mera

mein ye baiTha soch raha tha

kab ye zalim raat kaTegi

kab wapas aaega sawera

itne mein ek qamat-e-rana

qadam qadam par phul khilata

honTon se masum tabassum

aankhon se bijli barsata

mai-KHane mein jhum ke aaya

naz o ada ke dam bichhata

aish o tarab ki mahbubayen

nashsha-e-mai ki doshizaen

rah gain apni aankhen mal kar

aai qayamat chaal mein Dhal kar

sikkon ki jhankar pe gati

sone ki talwar nachati

apne lahu mein aap nahati

is nazuk lamhe mein main ne

hirs-o-hawas ko raqsan dekha

zad mein nizam-e-zardari ki

ruh-e-bashar ko larzan dekha

majburi ko uryan dekha

zikr nahin ye farzanon ka

qissa hai ek diwanon ka

gahre kohre ki lahron mein

sara london Dub gaya tha

lamhon ki raushan aankhon mein

sham ka kajal phail chuka tha

raat ki nili dewi jagi

din ke dewta ko nind aai

Dasne lagi mujh ko tanhai

mai-KHane mein ja kar main ne

aag se dil ki pyas bujhai

us mahfil mein sab hi kuchh tha

saqi bhi aur pir-e-mughan bhi

sahba ki aaghosh ke pale

tiflak-e-masti rind-e-jawan bhi

ghaza o rang ki mashuqaen

jin ki latafat shab bhar ki thi

itr aur resham ki minaen

jin ki sahba lab bhar ki thi

aaj ka sukh tha, kal ka dukh tha

aaj ki aasha, kal ki nirasha

hans hans kar gham dekh rahe the

in jhuTi KHushiyon ka tamasha

na-ummidi ke kandhon par

rakkha tha ummid ka lasha

aaj wo le len, jo mil jae

kal kya hoga kaun batae

aaj dilon ki shama jalaen

kal shayad ye raat na aae

aaj to mai ki kashti khe len

kal ye safina Dub na jae

aaj labon ka bosa le len

maut ka bosa kal lena hai

aaj dilon ka qarz chuka len

kal to sab kuchh de dena hai

is nazuk lamhe mein main ne

ruh-e-bashar ko viran dekha

atom-bomb ke KHauf ke aage

aql o KHirad ko hairan dekha

sare jahan ko larzan dekha

zikr nahin ye farzanon ka

qissa hai ek diwanon ka

dosh-e-hawa par tariki ne

zulfon ke KHam khol diye the

masco ki KHamosh faza mein

raat ki aankhon ke kajal ne

kitne jadu ghol diye the

surKH o siyah maKHmal ke upar

sham ke sayon ko nind aai

Dasne lagi mujh ko tanhai

mai-KHane mein ja kar main ne

aag se dil ki pyas bujhai

KHush-fikron ka abr-e-bahaaran

jhum paDa tha mai-KHanon par

baada-kashon ka rangin jhurmuT

TuT paDa tha paimanon par

saz ki lai mein tezi aai

nashsha-e-mai ki angDai ne

apna hasin parcham lahraya

chappa chappa zarra zarra

qatra qatra raqs mein aaya

naghmon ke be-tab bhanwar ko

lab ke TukDe chum rahe the

raqs ke bekal girdabon mein

jism ke tufan ghum rahe the

chehron ki raushan qindilen

banhon ki dil-kash mehraben

rag nazar ki KHamoshi ke

jumbish-e-mizhgan ki mizraben

is gardish mein darham-barham

sara nizam-e-shams-o-qamar tha

pighal gae the chand aur suraj

mahfil-e-gul mein raqs-e-sharar tha

raat ki peshani se jaise

taron ka jhumar TuT gaya ho

pir-e-falak ke hath se jaise

tasht-e-zamarrud chhuT gaya ho

hire, nilam, lal aur moti

KHak pe jaise bikhar rahe hain

jaise kisi ke barham gesu

bikhar bikhar kar sanwar rahe hon

nashsha-e-mai ke sar par lekin

aql o KHirad ka taj dhara tha

dur se baiTha baiTha mujh ko

ek sharabi dekh raha tha

us ne hawa mein hath se apne

nanha sa ek bosa phenka

ek titli si uDti aai

mere dil ke phul ke upar

kuchh kanpi aur kuchh manDlai

baiTh gai par joD ke donon

pyar ke ras ko chus ke uTThi

aur meri jaanib se hawa mein

bosa ban kar phir lahrai

kuchh sharmai, kuchh itrai

aur sharabi mez se uTh kar

raqs ke halqon se Takraata

kashti ki surat chakraata

hath mein apna jam uThae

meri jaanib jhumta aaya

KHandan KHandan, nazan nazan

raqsan raqsan, pechan pechan

mauj-e-hawa ko chumta aaya

meri zaban thi urdu, hindi

us ki zaban thi rusi lekin

ek zaban thi aisi bhi jo

donon zabanon se pyari thi

donon jis ko bol rahe the

chand ishaare chand tabassum

nazron ka KHamosh takallum

harf yahi the, lafz yahi the

shahad jo dil mein ghol rahe the

hind ki masti, rus ka naqsha

donon ne ek jam banaya

aur hawa mein us ko nachaya

sath hamare sab rindon ne

apne dilon ko hath mein le kar

mere watan ka jam uThaya

ab jo main ne muD kar dekha

jashn na tha ye diwanon ka

gird hamare amn ki dewi

git ki huren saz ki pariyan

naghme aur aawaz ki laDiyan

paris ki bad-baKHt hasina

maghrur america ka sipahi

london ka badmast sharabi

aish o tarab ki mahbubaen

nashsha-e-mai ki doshizaen

ghaza o rang ki mashuqaen

itr aur resham ki minaen

'hafiz' aur 'ghaalib' ki ghazlen

'pushkin' aur 'tagore' ki nazmen

kitne naz aur kitni adaen

kitni shirin aur lailaen

kitne ranjhe, kitni hiren

kitne but, kitni taswiren

amn ki koshish aur tadbiren

mashriq o maghrib ki taqdiren

halqa bandhe nach rahi thin

main ne is nazuk lamhe mein

ruh-e-bashar ko nazan dekha

nashsha o raqs ke pech o KHam mein

pyar ka jazba raqsan dekha

sare jahan ko KHandan dekha

zikr nahin ye farzanon ka

qissa hai ek diwanon ka