tum

shaguftagī kā latāfat kā shāhkār ho tum

faqat bahār nahīñ hāsil-e-bahār ho tum

jo ek phuul meñ hai qaid vo gulistāñ ho

jo ik kalī meñ hai pinhāñ vo lāla-zār ho tum

halāvatoñ kī tamannā, malāhatoñ kī murād

ġhurūr kaliyoñ kā phūloñ kā inkisār ho tum

jise tarañg meñ fitrat ne gungunāyā hai

vo bhairvīñ ho, vo dīpak ho vo malhār ho tum

tumhāre jism meñ ḳhvābīda haiñ hazāroñ raag

nigāh chheḌtī hai jis ko vo sitār ho tum

jise uThā na sakī justujū vo motī ho

jise na gūñdh sakī aarzū vo haar ho tum

jise na buujh sakā ishq vo pahelī ho

jise samajh na sakā pyaar bhī vo pyaar ho tum

ḳhudā kare kisī dāman meñ jazb ho na sakeñ

ye mere ashk-e-hasīñ jin se āshkār ho tum

shaguftagi ka latafat ka shahkar ho tum

faqat bahaar nahin hasil-e-bahaar ho tum

jo ek phul mein hai qaid wo gulistan ho

jo ek kali mein hai pinhan wo lala-zar ho tum

halawaton ki tamanna, malahaton ki murad

ghurur kaliyon ka phulon ka inkisar ho tum

jise tarang mein fitrat ne gungunaya hai

wo bhairwin ho, wo dipak ho wo malhaar ho tum

tumhaare jism mein KHwabida hain hazaron rag

nigah chheDti hai jis ko wo sitar ho tum

jise uTha na saki justuju wo moti ho

jise na gundh saki aarzu wo haar ho tum

jise na bujh saka ishq wo paheli ho

jise samajh na saka pyar bhi wo pyar ho tum

KHuda kare kisi daman mein jazb ho na saken

ye mere ashk-e-hasin jin se aashkar ho tum