us ka dil to achchha dil tha

ek hai aisī laḌkī jis se tum ne hañs kar baat na kī

kabhī na dekhā us kī āñkhoñ meñ chamke kaise motī

kabhī na sochā tum se aisī bāteñ vo kyuuñ kahtī hai

kabhī na samjhā milte ho to ghabrā.ī kyuuñ rahtī hai

kaise us ruḳhsār kī rañgat sarsoñ jaisī zard huī

jab tak milī nahīñ thī tum se vo aisī tanhā to na thī

mil kar aañkh bahāne se vo kab tak aañsū rokegī

us ke hoñToñ kī larzish bhī tum ne kabhī nahīñ dekhī

kyuuñ aisī sunsān saḌak par use akelā chhoḌ diyā

us kā dil to achchhā dil thā jis ko tum ne yuuñ toḌ diyā

vo kuchh nādim vo kuchh hairāñ rasta DhūñDā kartī thī

Dhaltī dhuup meñ apnā be kal saaya dekh ke hañstī thī

āḳhir sūraj Duub gayā aur raah meñ us ko shaam huī

ek hai aisi laDki jis se tum ne hans kar baat na ki

kabhi na dekha us ki aankhon mein chamke kaise moti

kabhi na socha tum se aisi baaten wo kyun kahti hai

kabhi na samjha milte ho to ghabrai kyun rahti hai

kaise us ruKHsar ki rangat sarson jaisi zard hui

jab tak mili nahin thi tum se wo aisi tanha to na thi

mil kar aankh bahane se wo kab tak aansu rokegi

us ke honTon ki larzish bhi tum ne kabhi nahin dekhi

kyun aisi sunsan saDak par use akela chhoD diya

us ka dil to achchha dil tha jis ko tum ne yun toD diya

wo kuchh nadim wo kuchh hairan rasta DhunDa karti thi

Dhalti dhup mein apna be kal saya dekh ke hansti thi

aaKHir suraj Dub gaya aur rah mein us ko sham hui