yagangat

zamāne meñ koī burā.ī nahīñ hai

faqat ik tasalsul kā jhūlā ravāñ hai

ye maiñ kah rahā huuñ

maiñ koī burā.ī nahīñ huuñ zamāna nahīñ huuñ tasalsul kā jhūlā nahīñ huuñ

mujhe kyā ḳhabar kyā burā.ī meñ hai kyā zamāne meñ hai aur phir maiñ to ye bhī kahūñgā

ki jo shai akelī rahe us kī manzil fanā hī fanā hai

burā.ī bhalā.ī zamāna tasalsul ye bāteñ baqā ke gharāne se aa.ī huī haiñ

mujhe to kisī bhī gharāne se koī ta.alluq nahīñ hai

maiñ huuñ ek aur maiñ akelā huuñ ek ajnabī huuñ

ye bastī ye jañgal ye bahte hue raste aur dariyā

ye parbat achānak nigāhoñ meñ aatī huī koī ūñchī imārat

ye ujḌe hue maqbare aur marg-e-musalsal kī sūrat mujāvir

ye hañste hue nanhe bachche ye gaaḌī se Takrā ke martā huā ek andhā musāfir

havā.eñ nabātāt aur āsmāñ par udhar se udhar aate jaate hue chand bādal

ye kyā haiñ

yahī to zamāna hai ye ek tasalsul kā jhūlā ravāñ hai

ye maiñ kah rahā huuñ

ye bastī ye jañgal ye raste ye dariyā ye parbat imārat mujāvir musāfir

havā.eñ nabātāt aur āsmāñ par udhar se udhar aate jaate hue chand bādal

ye sab kuchh ye har shai mire hī gharāne se aa.ī huī hai

zamāna huuñ maiñ mere hī dam se an-miT tasalsul kā jhūlā ravāñ hai

magar mujh meñ koī burā.ī nahīñ hai

ye kaise kahūñ maiñ

ki mujh meñ fanā aur baqā donoñ aa kar mile haiñ

zamane mein koi burai nahin hai

faqat ek tasalsul ka jhula rawan hai

ye main kah raha hun

main koi burai nahin hun zamana nahin hun tasalsul ka jhula nahin hun

mujhe kya KHabar kya burai mein hai kya zamane mein hai aur phir main to ye bhi kahunga

ki jo shai akeli rahe us ki manzil fana hi fana hai

burai bhalai zamana tasalsul ye baaten baqa ke gharane se aai hui hain

mujhe to kisi bhi gharane se koi talluq nahin hai

main hun ek aur main akela hun ek ajnabi hun

ye basti ye jangal ye bahte hue raste aur dariya

ye parbat achanak nigahon mein aati hui koi unchi imarat

ye ujDe hue maqbare aur marg-e-musalsal ki surat mujawir

ye hanste hue nanhe bachche ye gaDi se Takra ke marta hua ek andha musafir

hawaen nabaatat aur aasman par udhar se udhar aate jate hue chand baadal

ye kya hain

yahi to zamana hai ye ek tasalsul ka jhula rawan hai

ye main kah raha hun

ye basti ye jangal ye raste ye dariya ye parbat imarat mujawir musafir

hawaen nabaatat aur aasman par udhar se udhar aate jate hue chand baadal

ye sab kuchh ye har shai mere hi gharane se aai hui hai

zamana hun main mere hi dam se an-miT tasalsul ka jhula rawan hai

magar mujh mein koi burai nahin hai

ye kaise kahun main

ki mujh mein fana aur baqa donon aa kar mile hain