ye jo tanhai

ye jo tanhā.ī hai shāyad mirī tanhā.ī na ho

gūñjnā ho na samā.at meñ sukūt

aur shab-o-roz kī na.ash

merī dahlīz pe ayyām ne dafnā.ī na ho

anginat phuul hī khilte hoñ

ik shajar molrī kā ho kahīñ jis ke tale

yaar aġhyār gale milte hoñ

aan pahuñche hoñ ḳhushī ke mausam

raah takte hoñ mirī

aur mujh tak kisī baa.is ye ḳhabar aa.ī na ho

ho ke ḳhush hañste hue ahbāb tamām

bhejte hoñ mujhe kab se paiġhām

DhūñDte hoñ mujhe betābāna

raah takte hoñ mirī

aur mujh tak kisī baa.is ye ḳhabar aa.ī na ho

ye jo tanhai hai shayad meri tanhai na ho

gunjna ho na samaat mein sukut

aur shab-o-roz ki nash

meri dahliz pe ayyam ne dafnai na ho

anginat phul hi khilte hon

ek shajar molri ka ho kahin jis ke tale

yar aghyar gale milte hon

aan pahunche hon KHushi ke mausam

rah takte hon meri

aur mujh tak kisi bais ye KHabar aai na ho

ho ke KHush hanste hue ahbab tamam

bhejte hon mujhe kab se paigham

DhunDte hon mujhe betabana

rah takte hon meri

aur mujh tak kisi bais ye KHabar aai na ho