ye kaun tha

ġham kā hisār toḌne vaalā ye kaun thā

tārīḳh kā 'azīm havāla ye kaun thā

bharpūr inqalāb kī tā'mīr kis ne kī

tārīkiyoñ kī ḳhatm ye jāgīr kis ne kī

smolny meñ kis ne diyā dars-e-inqalāb

sarmā mahal pe kaun huā thā ye fat.h-yāb

jo tiira vādiyāñ thiiñ ujāloñ se paaT diiñ

daur-e-karanskī kī rageñ kis ne kaaT diiñ

gul-posh jis se ziist kā āñgan hai dosto

naam us 'azīm shaḳhs kā 'lenin' hai dosto

ab us ke tazkire haiñ zamāne meñ sub.h-o-shām

us rahbar-e-‘azīm ko 'be-dil' mirā salām

gham ka hisar toDne wala ye kaun tha

tariKH ka 'azim hawala ye kaun tha

bharpur inqalab ki ta'mir kis ne ki

tarikiyon ki KHatm ye jagir kis ne ki

smolny mein kis ne diya dars-e-inqalab

sarma mahal pe kaun hua tha ye fath-yab

jo tera wadiyan thin ujalon se paT din

daur-e-karanski ki ragen kis ne kaT din

gul-posh jis se zist ka aangan hai dosto

nam us 'azim shaKHs ka 'lenin' hai dosto

ab us ke tazkire hain zamane mein subh-o-sham

us rahbar-e-‘azim ko 'be-dil' mera salam