yun hi sahi

chalo yuuñ hī sahī

tum sab darīche band kar do

vo havā.eñ rok do

jo ḳhalā siine kā bharne ke liye aatī haiñ

sāñseñ tumhārī saath laatī haiñ

to ''lū'' aise samay

merī ragoñ meñ ḳhuun ke badle

vo paanī hai

jo armāñ saadh lene vaale peḌoñ kā muqaddar hai

mire tūfān kī maujeñ

kisī barfīle choTī kī vo tahrīreñ haiñ jin ko

ab faqat aise farishte paḌh sakeñge

jo kabhī bad-baḳht dhartī par utarte hī nahīñ

chalo yūñhī sahī

tum jo bhī chāho

jis tarah chāho vahī hogā

maiñ ik gardāb kī mānind vāpas lauTtā huuñ

us samundar meñ

ki jis kī tah meñ jā kar

sab ḳhazāne Duub jaate haiñ

chalo yun hi sahi

tum sab dariche band kar do

wo hawaen rok do

jo KHala sine ka bharne ke liye aati hain

sansen tumhaari sath lati hain

to lu aise samay

meri ragon mein KHun ke badle

wo pani hai

jo arman sadh lene wale peDon ka muqaddar hai

mere tufan ki maujen

kisi barfile choTi ki wo tahriren hain jin ko

ab faqat aise farishte paDh sakenge

jo kabhi bad-baKHt dharti par utarte hi nahin

chalo yunhi sahi

tum jo bhi chaho

jis tarah chaho wahi hoga

main ek gardab ki manind wapas lauTta hun

us samundar mein

ki jis ki tah mein ja kar

sab KHazane Dub jate hain