ziyarat

bahut se log mujh meñ mar chuke haiñ....

kisī kī maut ko vaaq.e hue baara baras biite

kuchh aaise haiñ ki tiis ik saal hone aa.e haiñ ab jin kī rahlat ko

idhar kuchh sānehe taaza bhī haiñ haftoñ mahīnoñ ke

kisī kī hādsātī maut achānak be-zamīrī kā natīja thī

bahut se dab ga.e malbe meñ dīvār-e-anā ke aap hī apnī

mare kuchh rābtoñ kī ḳhushk-sālī meñ

kuchh aaise bhī ki jin ko zinda rakhnā chāhā maiñ ne apnī palkoñ par

magar ḳhud ko jinhoñ ne merī nazroñ se girā kar ḳhud-kushī kar lī

bachā paayā na maiñ kitnoñ ko saarī koshishoñ par bhī

rahe bīmār muddat tak mire bātin ke bistar par

bil-āḳhir faut ho baiThe

gharoñ meñ daftaroñ meñ mahfiloñ meñ rāstoñ par

kitne qabristān qaa.em haiñ

maiñ jin se roz hī ho kar guzartā huuñ

ziyārat chalte-phirte maqbaroñ kī roz kartā huuñ

bahut se log mujh mein mar chuke hain

kisi ki maut ko waqe hue bara baras bite

kuchh aaise hain ki tis ek sal hone aae hain ab jin ki rahlat ko

idhar kuchh sanehe taza bhi hain hafton mahinon ke

kisi ki hadsati maut achanak be-zamiri ka natija thi

bahut se dab gae malbe mein diwar-e-ana ke aap hi apni

mare kuchh rabton ki KHushk-sali mein

kuchh aaise bhi ki jin ko zinda rakhna chaha main ne apni palkon par

magar KHud ko jinhon ne meri nazron se gira kar KHud-kushi kar li

bacha paya na main kitnon ko sari koshishon par bhi

rahe bimar muddat tak mere baatin ke bistar par

bil-aKHir faut ho baiThe

gharon mein daftaron mein mahfilon mein raston par

kitne qabristan qaem hain

main jin se roz hi ho kar guzarta hun

ziyarat chalte-phirte maqbaron ki roz karta hun