biis baras se ik taare par man kī jot jagātā huuñ

dīvālī kī raat ko tū bhī koī diyā jalāyā kar

bis baras se ek tare par man ki jot jagata hun

diwali ki raat ko tu bhi koi diya jalaya kar

pyaar kī jot se ghar ghar hai charāġhāñ varna

ek bhī sham.a na raushan ho havā ke Dar se

pyar ki jot se ghar ghar hai charaghan warna

ek bhi shama na raushan ho hawa ke Dar se

mil ke hotī thī kabhī eid bhī dīvālī bhī

ab ye hālat hai ki Dar Dar ke gale milte haiñ

mil ke hoti thi kabhi eid bhi diwali bhi

ab ye haalat hai ki Dar Dar ke gale milte hain

sabhī ke diip sundar haiñ hamāre kyā tumhāre kyā

ujālā har taraf hai is kināre us kināre kyā

sabhi ke dip sundar hain hamare kya tumhaare kya

ujala har taraf hai is kinare us kinare kya

hastī kā nazāra kyā kahiye martā hai koī jiitā hai koī

jaise ki divālī ho ki diyā jaltā jaa.e bujhtā jaa.e

hasti ka nazara kya kahiye marta hai koi jita hai koi

jaise ki diwali ho ki diya jalta jae bujhta jae

mele meñ gar nazar na aatā ruup kisī matvālī kā

phīkā phīkā rah jaatā tyauhār bhī is dīvālī kā

mele mein gar nazar na aata rup kisi matwali ka

phika phika rah jata tyauhaar bhi is diwali ka

aaj kī raat divālī hai diye raushan haiñ

aaj kī raat ye lagtā hai maiñ so saktā huuñ

aaj ki raat diwali hai diye raushan hain

aaj ki raat ye lagta hai main so sakta hun

rāhoñ meñ jaan ghar meñ charāġhoñ se shaan hai

dīpāvlī se aaj zamīn āsmān hai

rahon mein jaan ghar mein charaghon se shan hai

dipawli se aaj zamin aasman hai

thā intizār manāeñge mil ke dīvālī

na tum hī lauT ke aa.e na vaqt-e-shām huā

tha intizar manaenge mil ke diwali

na tum hi lauT ke aae na waqt-e-sham hua

hai dasahre meñ bhī yuuñ gar farhat-o-zīnat 'nazīr'

par divālī bhī ajab pākīza-tar tyauhār hai

hai dasahre mein bhi yun gar farhat-o-zinat 'nazir'

par diwali bhi ajab pakiza-tar tyauhaar hai

dāġhoñ kī bas dikhā dī divālī meñ raushnī

ham sā na hogā koī jahāñ meñ divāliya

daghon ki bas dikha di diwali mein raushni

hum sa na hoga koi jahan mein diwaliya

dosto kyā kyā divālī meñ nashāt-o-aish hai

sab muhayyā hai jo is hañgām ke shāyāñ hai shai

dosto kya kya diwali mein nashat-o-aish hai

sab muhayya hai jo is hangam ke shayan hai shai

hone do charāġhāñ mahloñ meñ kyā ham ko agar dīvālī hai

mazdūr haiñ ham mazdūr haiñ ham mazdūr kī duniyā kaalī hai

hone do charaghan mahlon mein kya hum ko agar diwali hai

mazdur hain hum mazdur hain hum mazdur ki duniya kali hai

jal bujhūñgā bhaḌak ke dam bhar meñ

maiñ huuñ goyā diyā divālī kā

jal bujhunga bhaDak ke dam bhar mein

main hun goya diya diwali ka

jo sunte haiñ ki tire shahr meñ dashrā hai

ham apne ghar meñ divālī sajāne lagte haiñ

jo sunte hain ki tere shahr mein dashra hai

hum apne ghar mein diwali sajaane lagte hain

khiḌkiyoñ se jhāñktī hai raushnī

battiyāñ jaltī haiñ ghar ghar raat meñ

khiDkiyon se jhankti hai raushni

battiyan jalti hain ghar ghar raat mein

vo din bhī haa.e kyā din the jab apnā bhī ta.alluq thā

dashahre se divālī se basantoñ se bahāroñ se

wo din bhi hae kya din the jab apna bhi talluq tha

dashahre se diwali se basanton se bahaaron se