جی چاہتا ہے صانع قدرت پہ ہوں نثار

بت کو بٹھا کے سامنے یاد خدا کروں

سانولے تن پہ قبا ہے جو ترے بھاری ہے

لالہ کہتا ہے چمن میں کہ یہ گردھاریؔ ہے

ہنگام وصل رد و بدل مجھ سے ہے عبث

نکلے گا کچھ نہ کام نہیں اور ہاں سے آج

چٹکیاں دل میں مرے لینے لگا ناخن عشق

گلبدن دیکھ کے اس گل کا بدن یاد آیا

وہم ہی وہم میں اپنی ہوئی اوقات بسر

کمر یار کو بھولے تو دہن یاد آیا

سرو کو دیکھ کے کہتا ہے دل بستۂ زلف

ہم گرفتار ہیں اس باغ میں آزاد ہیں سب

کس قدر دل سے فراموش کیا عاشق کو

نہ کبھی آپ کو بھولے سے بھی میں یاد آیا

کس طرح امانتؔ نہ رہوں غم سے میں دلگیر

آنکھوں میں پھرا کرتی ہے استاد کی صورت

گالی کے سوا ہاتھ بھی چلتا ہے اب ان کا

ہر روز نئی ہوتی ہے بیداد کی صورت

بوسہ آنکھوں کا جو مانگا تو وہ ہنس کر بولے

دیکھ لو دور سے کھانے کے یہ بادام نہیں

ہے لطف حسینوں کی دو رنگی کا امانتؔ

دو چار گلابی ہوں تو دو چار بسنتی

محشر کا کیا وعدہ یاں شکل نہ دکھلائی

اقرار اسے کہتے ہیں انکار اسے کہتے ہیں

دامن پہ لوٹنے لگے گر گر کے طفل اشک

روئے فراق میں تو دل اپنا بہل گیا

رواں دواں نہیں یاں اشک چشم تر کی طرح

گرہ میں رکھتے ہیں ہم آبرو گہر کی طرح

گھر مرے شب کو جو وہ رشک قمر آ نکلا

ہو گئے پرتو رخ سے در و دیوار سفید