دھوپ نکلی ہے بارشوں کے بعد

وہ ابھی رو کے مسکرائے ہیں

صبح کا خواب عمر بھر دیکھا

اور پھر نیند آ گئی انجمؔ

دوستی بندگی وفا و خلوص

ہم یہ شمع جلانا بھول گئے

نیند کیوں ٹوٹ گئی آخر شب

کون میرے لئے تڑپا ہوگا

خودکشی کرنے میں بھی ناکام رہ جاتے ہیں ہم

کون امرت گھول دیتا ہے ہمارے زہر میں

رنگ ہی سے فریب کھاتے رہیں

خوشبوئیں آزمانا بھول گئے

دل ہر ضد منوا لیتا ہے

یہ بچہ شیطان بہت ہے

دل بجھا بجھا ہو تو کیا برا ہے رونے میں

بارشوں کے بعد انجم آسماں نکھرتا ہے

آپ کے بھی ہو جائیں گے ہم

پہلے اپنے تو ہو لیں

تیرے جاتے ہی یہ ہوا محسوس

آئنے مسکرانا بھول گئے

راہ وفا پر چلنے والے

یہ رستہ ویران بہت ہے

اس نے دریا کو لگا کر ٹھوکر

پیاس کی عمر بڑھائی ہوگی

دل کا کیا کروں یارو مانتا نہیں میری

اپنے دل کی سنتا ہے اپنے من کی کرتا ہے

بستی میں اک پھول کھلا

محلوں محلوں چرچا ہے

سنتے ہیں اک ہوا کا جھونکا

اک خوشبو کو لے بھاگا ہے

خوشبوئیں پھوٹ کے روئی ہوں گی

گل ہواؤں میں جو بکھرا ہوگا