ادا سے دیکھ لو جاتا رہے گلہ دل کا

بس اک نگاہ پہ ٹھہرا ہے فیصلہ دل کا

اپنے بیگانے سے اب مجھ کو شکایت نہ رہی

دشمنی کر کے مرے دوست نے مارا مجھ کو

اے بے خودی دل مجھے یہ بھی خبر نہیں

کس دن بہار آئی میں دیوانہ کب ہوا

آخر انسان ہوں پتھر کا تو رکھتا نہیں دل

اے بتو اتنا ستاؤ نہ خدارا مجھ کو

دست جنوں نے پھاڑ کے پھینکا ادھر ادھر

دامن ابد میں ہے تو گریباں ازل میں ہے

پھر مجھ سے اس طرح کی نہ کیجے گا دل لگی

خیر اس گھڑی تو آپ کا میں کر گیا لحاظ

ہونٹھوں میں داب کر جو گلوری دی یار نے

کیا دانت پیسے غیروں نے کیا کیا چبائے ہونٹھ

آثار رہائی ہیں یہ دل بول رہا ہے

صیاد ستم گر مرے پر کھول رہا ہے

خفا ہو گالیاں دو چاہے آنے دو نہ آنے دو

میں بوسے لوں گا سوتے میں مجھے لپکا ہے چوری کا

زمین پاؤں کے نیچے سے سرکی جاتی ہے

ہمیں نہ چھیڑئیے ہم ہیں فلک ستائے ہوئے

رستے میں ان کو چھیڑ کے کھاتے ہیں گالیاں

بازار کی مٹھائی بھی ہوتی ہے کیا لذیذ

کریں گے ہم سے وہ کیوں کر نباہ دیکھتے ہیں

ہم ان کی تھوڑے دنوں اور چاہ دیکھتے ہیں

کرو تم مجھ سے باتیں اور میں باتیں کروں تم سے

کلیم اللہ ہو جاؤں میں اعجاز تکلم سے

یہی انصاف ترے عہد میں ہے اے شہ حسن

واجب القتل محبت کے گنہ گار ہیں سب

خدا حافظ ہے اب اے زاہدو اسلام عاشق کا

بتان دہر غالب آ گئے ہیں کعبہ و دل پر

بنا کر تل رخ روشن پر دو شوخی سے سے کہتے ہیں

یہ کاجل ہم نے یارا ہے چراغ ماہ تاباں پر

عمر تو اپنی ہوئی سب بت پرستی میں بسر

نام کو دنیا میں ہیں اب صاحب اسلام ہم

چلا ہے چھوڑ کے تنہا کدھر تصور یار

شب فراق میں تھا تجھ سے مشغلہ دل کا

یاد دلوایئے ان کو جو کبھی وعدۂ وصل

تو وہ کس ناز سے فرماتے ہیں ہم بھول گئے

ہمت کا زاہدوں کی سراسر قصور تھا

مے خانہ خانقاہ سے ایسا نہ دور تھا

ستم وہ تم نے کیے بھولے ہم گلہ دل کا

ہوا تمہارے بگڑنے سے فیصلہ دل کا

وہ ایک رات تو مجھ سے الگ نہ سوئے گا

ہوا جو لذت بوس و کنار سے واقف

اے پری زاد جو تو رقص کرے مستی میں

دانۂ تاک ہر اک پاؤں میں گھنگھرو ہو جائے

رخ تہ زلف ہے اور زلف پریشاں سر پر

مانگ بالوں میں نہیں ہے یہ نمایاں سر پر

سندور اس کی مانگ میں دیتا ہے یوں بہار

جیسے دھنک نکلتی ہے ابر سیاہ میں

منزل ہے اپنی اپنی قلقؔ اپنی اپنی گور

کوئی نہیں شریک کسی کے گناہ میں

کیا کوئی دل لگا کے کہے شعر اے قلقؔ

ناقدریٔ سخن سے ہیں اہل سخن اداس

یار کی فرط نزاکت کا ہوں میں شکر گزار

دھیان بھی اس کا مرے دل سے نکلنے نہ دیا

وہ رند ہوں کہ مجھے ہتھکڑی سے بیعت ہے

ملا ہے گیسوئے جاناں سے سلسلہ دل کا

میں وہ میکش ہوں ملی ہے مجھ کو گھٹی میں شراب

شیر کے بدلے پیا ہے میں نے شیرہ تاک کا

کھلنے سے ایک جسم کے سو عیب ڈھک گئے

عریاں تنی بھی جوش جنوں میں لباس ہے

گھاٹ پر تلوار کے نہلائیو میت مری

کشتۂ ابرو ہوں میں کیا غسل خانہ چاہئے

خط میں لکھی ہے حقیقت دشت گردی کی اگر

نامہ بر جنگلی کبوتر کو بنانا چاہئے

عالم پیری میں کیا موئے سیہ کا اعتبار

صبح صادق دیتی ہے جھوٹی گواہی رات کی

نیا مضمون لانا کاٹنا کوہ و جبل کا ہے

نہیں ہم شعر کہتے پیشۂ فرہاد کہتے ہیں

بہار آتے ہی زخم دل ہرے سب ہو گئے میرے

ادھر چٹکا کوئی غنچہ ادھر ٹوٹا ہر اک ٹانکا

مجھ سے ان آنکھوں کو وحشت ہے مگر مجھ کو ہے عشق

کھیلا کرتا ہوں شکار آہوئے صحرائی کا

ہوا میں رند مشرب خاک مر کر اس تمنا میں

نماز آخر پڑھیں گے وہ کسی دن تو تیمم سے

جب ہوا گرم کلام مختصر مہکا دیا

عطر کھینچا یار کے لب نے گل تقریر کا

پوچھا صبا سے اس نے پتا کوئے یار کا

دیکھو ذرا شعور ہمارے غبار کا

کفر و اسلام کے جھگڑوں سے چھڑایا صد شکر

قید مذہب سے جنوں نے مجھے آزاد کیا

ان واعظوں کی ضد سے ہم اب کی بہار میں

توڑیں گے توبہ پیر مغاں کی دکان پر

چھیڑا اگر مرے دل نالاں کو آپ نے

پھر بھول جائیے گا بجانا ستار کا

ترے ہونٹھوں سے شرما کر پسینے میں ہوا یہ تر

خضر نے خود عرق پونچھا جبین آب حیواں کا

مثال آئنہ ہم جب سے حیرتی ہیں ترے

کہ جن دنوں میں نہ تھا تو سنگار سے واقف

دل خستہ ہو تو لطف اٹھے کچھ اپنی غزل کا

مطلب کوئی کیا سمجھے گا مستوں کی زٹل کا

مے جو دی غیر کو ساقی نے کراہت دیکھو

شیشۂ مے کو مرض ہو گیا ابکائی کا

خوش قدوں سے کبھی عالم نہ رہے گا خالی

اس چمن سے جو گیا سرو تو شمشاد آیا

مدلل جو سخن اپنا ہے وہ برہان قاطع ہے

طبیعت میں روانی ہے زیادہ ہفت قلزم سے

جمے کیا پاؤں میرے خانۂ دل میں قناعت کا

جگر میں چٹکیاں لیتا ہے ناخن دست حاجت کا