ہم بھی کیا زندگی گزار گئے

دل کی بازی لگا کے ہار گئے

کل تک تو آشنا تھے مگر آج غیر ہو

دو دن میں یہ مزاج ہے آگے کی خیر ہو

ساتھ شوخی کے کچھ حجاب بھی ہے

اس ادا کا کہیں جواب بھی ہے

مجھ کو ملا یہ شکوۂ دشنام پر جواب

آپ اس سے عشق کیجیے جس کی زباں نہ ہو

پھر گیا جب سے کوئی آ کے ہمارے در تک

گھر کے باہر ہی پڑے رہتے ہیں گھر چھوڑ دیا

حضرت داغؔ ہے یہ کوچۂ قاتل اٹھئے

جس جگہ بیٹھتے ہیں آپ تو جم جاتے ہیں

ساقیا تشنگی کی تاب نہیں

زہر دے دے اگر شراب نہیں

نہ سمجھا عمر گزری اس بت کافر کو سمجھاتے

پگھل کر موم ہو جاتا اگر پتھر کو سمجھاتے

رہے سینہ تنا لنگر سے اس کے

یہ چوٹی اس لیے پیچھے پڑی ہے

سر مرا کاٹ کے پچھتائیے گا

جھوٹی پھر کس کی قسم کھایئے گا

شب وصل کی کیا کہوں داستاں

زباں تھک گئی گفتگو رہ گئی

شرکت غم بھی نہیں چاہتی غیرت میری

غیر کی ہو کے رہے یا شب فرقت میری

دنیا میں جانتا ہوں کہ جنت مجھے ملی

راحت اگر ذرا سی مصیبت میں مل گئی

دیکھنا حشر میں جب تم پہ مچل جاؤں گا

میں بھی کیا وعدہ تمہارا ہوں کہ ٹل جاؤں گا

اب تو بیمار محبت تیرے

قابل غور ہوئے جاتے ہیں

ٹھوکر بھی راہ عشق میں کھانی ضرور ہے

چلتا نہیں ہوں راہ کو ہموار دیکھ کر

رہ گئے لاکھوں کلیجہ تھام کر

آنکھ جس جانب تمہاری اٹھ گئی

غش کھا کے داغؔ یار کے قدموں پہ گر پڑا

بے ہوش نے بھی کام کیا ہوشیار کا

اس لیے وصل سے انکار ہے ہم جان گئے

یہ نہ سمجھے کوئی کیا جلد کہا مان گئے

زاہد نہ کہہ بری یہ مستانے آدمی ہیں

تجھ کو لپٹ پڑیں گے دیوانے آدمی ہیں

آپ پچھتائیں نہیں جور سے توبہ نہ کریں

آپ کے سر کی قسم داغؔ کا حال اچھا ہے

طبیعت کوئی دن میں بھر جائے گی

چڑھی ہے یہ ندی اتر جائے گی

ناصح نے میرا حال جو مجھ سے بیاں کیا

آنسو ٹپک پڑے مرے بے اختیار آج

عرض احوال کو گلا سمجھے

کیا کہا میں نے آپ کیا سمجھے

ظالم نے کیا نکالی رفتار رفتہ رفتہ

اس چال پر چلے گی تلوار رفتہ رفتہ

میرؔ کا رنگ برتنا نہیں آساں اے داغؔ

اپنے دیواں سے ملا دیکھیے دیواں ان کا

حسرتیں لے گئے اس بزم سے چلنے والے

ہاتھ ملتے ہی اٹھے عطر کے ملنے والے

دشمنوں سے دوستی غیروں سے یاری چاہئے

خاک کے پتلے بنے تو خاکساری چاہئے

لپٹ جاتے ہیں وہ بجلی کے ڈر سے

الٰہی یہ گھٹا دو دن تو برسے

چپ چاپ سنتی رہتی ہے پہروں شب فراق

تصویر یار کو ہے مری گفتگو پسند

عاشقی سے ملے گا اے زاہد

بندگی سے خدا نہیں ملتا

پھرتا ہے میرے دل میں کوئی حرف مدعا

قاصد سے کہہ دو اور نہ جائے ذرا سی دیر

لاکھ دینے کا ایک دینا تھا

دل بے مدعا دیا تو نے

نگہ نکلی نہ دل کی چور زلف عنبریں نکلی

ادھر لا ہاتھ مٹھی کھول یہ چوری یہیں نکلی

ہزاروں کام محبت میں ہیں مزے کے داغؔ

جو لوگ کچھ نہیں کرتے کمال کرتے ہیں

شب وصال ہے گل کر دو ان چراغوں کو

خوشی کی بزم میں کیا کام جلنے والوں کا

حضرت داغ جہاں بیٹھ گئے بیٹھ گئے

اور ہوں گے تری محفل سے ابھرنے والے

اک ادا مستانہ سر سے پاؤں تک چھائی ہوئی

اف تری کافر جوانی جوش پر آئی ہوئی

حضرت دل آپ ہیں کس دھیان میں

مر گئے لاکھوں اسی ارمان میں

روح کس مست کی پیاسی گئی مے خانے سے

مے اڑی جاتی ہے ساقی ترے پیمانے سے

ابھی کمسن ہو رہنے دو کہیں کھو دو گے دل میرا

تمہارے ہی لیے رکھا ہے لے لینا جواں ہو کر

خدا کی قسم اس نے کھائی جو آج

قسم ہے خدا کی مزا آ گیا

میں مر گیا تو خاک بھی ان کو نہ غم ہوا

کہتے ہیں ایک چاہنے والا تو کم ہوا

چاک ہو پردۂ وحشت مجھے منظور نہیں

ورنہ یہ ہاتھ گریبان سے کچھ دور نہیں

ان کی فرمائش نئی دن رات ہے

اور تھوڑی سی مری اوقات ہے

تم کو چاہا تو خطا کیا ہے بتا دو مجھ کو

دوسرا کوئی تو اپنا سا دکھا دو مجھ کو

یوں میرے ساتھ دفن دل بے قرار ہو

چھوٹا سا اک مزار کے اندر مزار ہو

آئینہ دیکھ کے یہ دیکھ سنورنے والے

تجھ پہ بے جا تو نہیں مرتے یہ مرنے والے

مجھ گنہ گار کو جو بخش دیا

تو جہنم کو کیا دیا تو نے

ہو سکے کیا اپنی وحشت کا علاج

میرے کوچے میں بھی صحرا چاہئے